Azərbaycan və Latviya xidməti pasport sahibləri üçün viza rejimini ləğv edib

Azərbaycan və Avropa İttifaqı arasında yeni saziş "Şərq Tərəfdaşlığı"nın bu ilin noyabrında keçiriləcək sammitinə qədər hazırlana bilər, bu barədə bazar ertəsi Bakıda Latviya XİN başçısı Edqars Rinkeviçs bildirib.

    O, yeni sazişin tərəfdaşlığı strateji etməyə imkan verəcəyinə ümid etdiyini deyib.

    Rinkeviçsin Azərbaycan XİN başçısı Elmar Məmmədyarovla danışıqlarının yekunlarına görə xidməti pasport sahibləri üçün viza rejiminin ləğv edilməsi haqqında hökumətlərarası saziş imzalanıb.

    "Təhsil sahəsində əməkdaşlıq haqqında müqavilənin hazırlanmasını da sürətləndirmək istərdik, belə ki, Latviya ali məktəblərində 100-dən çox azərbaycanlı tələbə təhsil alır", deyə Latviyalı diplomat bildirib.

    Onun sözlərinə görə, turizm sahəsində əməkdaşlıq məsələləri də müzakirə olunub.

    E.Məmmədyarov öz növbəsində qeyd edib ki, Bakı da Avropa İttifaqı ilə əməkdaşlığın genişləndirilməsində maraqlıdır və hazırda əməkdaşlıq üzrə yeni sazişlə bağlı Brüssellə danışıqlar aparılır. "Bundan başqa, bizim energetika sahəsində strateji tərəfdaşlıq haqqında sənədimiz var. Bütün bunlar bizim Aİ ilə münasibətlərimizi dərinləşdirmək, onları strateji əməkdaşlıq səviyyəsinə çıxarmaq üçün yaxşı baza yaradır", deyə Məmmədyarov bildirib.

    Tərəflər nəqliyyat sahəsində əməkdaşlıq məsələlərini də müzakirə ediblər.

    Latviya ZUBR konteyner qatarı marşrutunun Ukraynadan Azərbaycana, daha sonra isə Çinə qədər uzadılmasında maraqlıdır, deyə Rinkeviçs bildirib.

    ZUBR konteyner qatarı Latviya, Belarus, Ukrayna və Estoniya dəmir yollarının birgə layihəsidir.

    "Azərbaycan ZUBR marşrutunu siyasi nöqteyi-nəzərdən üç dənizi - Qara dəniz, Xəzər dənizi və Baltik dənizini birləşdirən maraqlı layihə kimi qiymətləndirir. Öz-özlüyündə bu, üç fərqli regionun birləşməsinə gətirib çıxarır. Biz təkcə "Şimal-Cənub" beynəlxalq nəqliyyat dəhlizi layihəsi ilə kifayətlənməyəcəyik", deyə Azərbaycan XİN başçısı Elmar Məmmədyarov bildirib. -06D-