Azərbaycanda mühəndis olmaq imkanları nə qədərdir?

“Gənc Mühəndislərin İnkişafı” ictimai birliyi “Azərbaycanda mühəndislik imkanları” mövzusunda layihəsinin icrası ilə bağlı Türkiyədə bir günlük seminar həyata keçirməyi nəzərdə tutur. Bu haqda qurumun mətbuata açıqlamasında bildirilir.

Seminar Türkiyədə mühəndis ixtisası alan tələbələri Azərbaycanda mühəndilsik imkanları ilə tanış etməyi öndə tutur.

Tədbirə Azərbaycanda mühəndislik sahəsində ən çox işə götürən firmaların (BP, Halliburton, Sehlimberger, Narmobile) təmsilçilərinin qatılması gözlənilir. Tədbirin əsas məqsədi azərbaycanlı tələbələrin qazandıqları bilik və bacarıqların Azərbaycana xidmət etməsinə yönəltməkdir.

Tədbirin aprelin 19-u səhər saat 09:00-dan axşam saat 17:30-a qədər İstanbulun “Point” otelində keçirilməsi qərara alınıb. Tədbirdə ölkədə mühəndislik, bu sahədə karyeranın qurulması imkanlarının müzakirə olunacağı, bu sahə ilə bağlı sualların cavablandırılacağı qeyd olunur. Tədbirin sonu olaraq bu sahədə uğur qazanan şəxslərə sertifikatların təqdimatı mərasiminin keçiriləcəyi gözlənilir.

Buna qədərsə qurum 2013-cü ilin layihə müsabiqəsinə qatılıb və dövlət başçısı yanında Gənclər Fondu III qrant müsabiqəsinin qalibi olub. Bununla bağlı birlik “Gəlin mühəndis olaq!” layihəsinin icrasına start verib. 2013-cü ilin oktyabr-dekabr aylarında layihəni icra edib. Layihə Şirvan, Şəki, Quba, Lənkəran və Gəncə şəhərlərində həyata keçirilib. Layihənin ən böyük uğuru kimi layihənin icrasına qədər tədbirə qatılanların 45%-i mühəndis olmaq istəyibsə, layihədən sonra bu faiz 60-a yüksəlməsi sayılır. 

Birlik 2008-ci ildən dövlət qeydiyyatına alınıb və ofisi “Atlas Palace”də yerləşir. -05B-