Azərbaycanda uşaq ölümü ilə bağlı vəziyyət pisdir

  Dünya Səhiyyə Təşkilatının və UNİCEF uşaq ölümlərinin dünya üzrə sayının 1990-cı ildən  50 faiz azaldığını bildirir. Bununla bağlı hesabatda deyilir ki, 25 il əvvəl 5 yaşından aşağı uşaqlar arasında ölüm hallarının sayı 12, 7 milyon idisə, bu il bu rəqəmin 6 milyondan az olacağı gözlənilir.

Azərbaycanda da 1990-cı illə müqayisədə hər min nəfərə düşən uşaq ölümü hallarının sayı yarıbayarı azalaraq 95-dən 32-yə düşüb, lakin bu, Cənubi Qafqazda ən pis göstəricidir.

Azərbaycanın reytinq cədvəlindəki yeri 68-dirsə, Ermənistan (Qazaxıstan da) 14, Gürcüstan isə 12-ci yerdədir.

Ermənistanda indi hər min nəfərə 18, Gürcüstanda isə 15 uşaq ölümü qeydə alınıb. Azərbaycanın minillik hədəfə 2030-cu ildə çatacağı gözlənilir. Bu hədəf hər 1000 doğuşdan 32 və daha az ölüm deməkdir.

Uşaq ölümlərinə görə yalnız Tacikistan (72), Türkmənistan (95) və Özbəkistan (80) Azərbaycandan irəlidədir.

Uşaq ölümünün ən az baş verdiyi ölkələr Şimali və Qərbi Avropadadır. Bunlar Lüksemburq, İslandiya, Finlandiya və Norveçdir. Bu ölkələrdə hər min uşaqdan ölənlərin sayı 3-dən azdır.

Səhiyyə Nazirliyindən  verilən məlumatda deyilir ki, ötən il “Ana və uşaqların sağlamlığının yaxşılaşdırılması haqqında” 2014-2020-ci illəri əhatə edən Dövlət Proqramı qəbul edilib.

Ötən il doğum göstəricisi əhalinin hər min nəfərinə 18,3, ölüm isə 5,8 təşkil edib. Təbii artım 12,5 olub ki, bu da Avropa ölkələri arasında ən yüksək göstəricidir:

Nazirlikdən qeyd olunub ki, ötən il körpə ölümü göstəricisi 10,2 promilli olub. Halbuki, bu rəqəm 2009-cu ildə 11,3 promilli idi. Ana ölümü əmsalı isə hər 1000 diridoğulmaya qarşı 14,5-ə bərabər olub.

Beynəlxalq hesabatla aşağıdakı linkdə tanış olmaq olar: http://www.childmortality.org/files_v20/download/IGME%20Report%202015_9_3%20LR%20Web.pdf--16D-