Mətbuat-Monitorinq 10.09.15

Rəsmi qəzetlər dövlət başçısı İlham Əliyevin İsveçrənin Azərbaycandakı səfirini qəbul etməsi haqda xəbəri, Gəncə “İmamzadə”sinin bərpasına daha 4 milyon manatın ayrılması haqda sərəncamının mətnini ilk səhifələrdə yerləşdiriblər.

“Azərbaycan” qəzeti rəsmi Bakıdan insan haqlarına sayğı tələb etdiyinə görə ABŞ və Avropa dövlətlərini aşağılayıcı “ABŞ-ın jandarm siyasəti və Avropanı məhvə sürükləyən qaçqın siyasəti” adlı məqalə dərc edib.

“Azadlıq”  baş nazirin müavini Abid Şərifovun qardaşına məxsus “EVRASCON” şirkətinin yol tikintisini vaxtında başa çatdırmadığı üçün 23 milyon cəriməyə məhkum edilərək Moldovadan qovulmasını, Salyanda bu şirkətin zəhmət haqlarını ödəmədiyi 400 fəhlənin etiraza qalxmasını manjetə çıxarıb.

“The Waşinqton Post” qəzeti “milli təhlükəsilzik” bəhanəsilə rəsmi Bakının jurnalistlərə repressiyasından yazaraq Qərbdən müdaxilə olmasa burada durumun yaxşlaşmayacağını bildirir.

Rəsmi Bakı ilə qarşıdurmada olan məcburi mühacir Hüseyn Abdullayevin anası Zeynəb Abdullayeva xaricə çıxışına icazə verilmədiyi üçün Daxili İşlər Nazilriyi və “bandotdel”i məhkəməyə verib.

Prezident İlham Əliyevin bu günlərdəki müşavirədə iqtisadi durum və xarici siyasət barədə ziddiyyətli fikirlər söyləməsini qəzet “hakimiyyət daxilində isterik vəziyyətin” olması kimi xarakterizə edir.   

Azərbaycandakı repressiyalarla bağlı Avropa Parlamentinin qətnamə layihəsini bu gün müzakirəyə çıxaracağını yazan qəzet qurumun Avropa İttifaqını  Azərbaycanda insan haqlarını pozanlara qarşı ünvanlı sanksiya məsələsinə baxmağa, beynəlxalq müşahidəçiləri Azərbaycandakı seçkilərə getməməyə çağırdığını bildirir.   

Xaçmaz rayonunun topdansatışla məşğul olan sakinləri Nəqliyyat Departamentinin yüksək rüşvət tələbləri üzündən meyvə-tərəvəzi yollarda çürüdərək geri qaytarmağa məcbur olduqlarını deyirlər.

“Ekspress”   Sumqayıtın yeni icra başçısı Zakir Fərəcovun yerli məmurlara “sizi sumqayıtlıların əlinə versəm parçalayarlar” hədəsini diqqət mərkəzinə çəkib.

BMT baş komissarı Zeyd Raad əl-Hüseynin Azərbaycanda insan hüquqlarının tapdanması ilə bağlı bəyanatına Azərbaycan XİN “sifarişli və qeyri-obyektiv” cavabını verib.

“Exo” avqust ayında istehlak mallarının 2,5% bahalaşmasına diqqət çəkərək ekspertlərə isnadən ilin sonuna kimi  bütünlükdə keçən illə müqayisədə 50%  bahalaşma olacağını ön plana çıxarır.

“Bizim yol”  gələn ilin dövlət büdcəsində iri layihələrə pul ayrılmamasına “ölkədə işsizliyin kəskin artacağı” mövqeyini ilk səhifədə yerləşdirib.

Qəzet 162 milyon manatdan artıq vəsaiti gizlədən 1394 fiziki və hüquqi şəxsə cinayət işinin açıldığını nəzərə çatdırır.

“Yeni Müsavat”  erməni tərəfinin Qarabağda 11 min suriyalı ermənini yerləşdirməsini ilk səhifəyə çıxarıb.

Azərbaycanda siyasi fəaliyyətinə görə qohumların həmin şəxsdən imtina etməsi kimi rəzalət davam edir, belə ki, mühacir Rəsul Mürsəlovun valideynləri ondan imtina ediblər.

Son bir ayda ərzaq məhsullarının 30%-dək bahalaşdığını yazan qəzet marketlərdəki qiymət artımının rəsmən təsdiqləndiyini, alıcıların isə narazı qaldıqlarını qeyd edir.