Azərbaycanda «Xalq nəzarəti»ni bərpa etmək qərarına gəliblər

Dövlət başçısının fərmanı ilə Ölkə Prezidenti yanında Apellyasiya Şurası yaradılıb.

“Şura sahibkarlıq fəaliyyəti göstərən fiziki və hüquqi şəxslərin müraciətlərinə baxılması sahəsində çox pilləliyin təmin edilməsi, mərkəzi və yerli icra hakimiyyəti orqanlarının qərarlarından, hərəkət və ya hərəkətsizliyindən yuxarı orqana şikayətlərin verilməsi mexanizminin təkmilləşdirilməsi məqsədi ilə yaradılır”, deyə fərmanda bildirilir.

Prezident Administrasiyasına Şuranın fəaliyyətinin təşkili üzrə zəruri tədbirləri görmək tapşırılıb. Nazirlər Kabinetinə bu fərmandan irəli gələn məsələləri həll etmək tapşırılıb.

Bu yeni qurumun konkret olaraq nə ilə məşğul olacağı bildirilmir. Lakin göründüyü kimi, bu orqan vətəndaşların müxtəlif dövlət orqanlarının fəaliyyətindən şikayətlərini araşdırmaq məqsədi daşıyır. Faktiki olaraq, Şura məhkəmələri əvəz edəcək, baxmayaraq ki, Şuranın səlahiyyətləri hələlik aydın deyil. Məsələn, bu və ya digər pozuntular aşkar edildikdə hansı addımların atılacağı aydın deyil.

Bu orqanın ortaya çıxması məhkəmələrin öz funksiyalarını yerinə yetirmədiyini göstərir. Eyni zamanda, güc qurumlarına və digər dövlət orqanlarına qarşı iradları başqa dövlət orqanı araşdıracaqsa, deməli dövlət başçısının həmin qurumlara etibarı yoxdur. -02D-