Azərbaycanın dini liderləri dünya birliyinə müraciət etdilər

Azərbaycanın dini liderləri Xocalı soyqırımı ilə bağlı dünya dini liderlərinə, parlamentlərə, beynəlxalq qurumlara və Avropa İnsan Haqları Məhkəməsinə müraciət ünvanlayıblar. 

“24 il öncə Xocalıda törədilmiş soyqırımın ildönümü ərəfəsində din, dil və milli mənsubiyyət fərqinə varmadan bütün dünya ictimaiyyətinə müraciət edirik. Əminik, elə bir din yoxdur ki, ümumbəşəri dəyərlərə zidd olan zorakılıq, qətl, təcavüz kimi qeyri-insani cinayət əməllərinə haqq qazandırsın. Ermənilərin Xocalıda həyata keçirdikləri məqsədyönlü soyqırım aktı törətdikləri vəhşiliklərin kulminasiya nöqtəsidir. Tarixi reallıq kimi Xocalı qətliyamı Holokost, Hernika, Xatın soyqırımları kimi insanlığa qarşı törədilmiş qətliyamların bir rəmzidir. İyirmi ildən çoxdur ki, erməni terrorçuları bu cinayətlərə görə hələ də cəza almayıblar.

Dini liderlərə görə, hazırda dünyanı bürüyən miqrant böhranı Azərbaycanın vaxtı ilə üzləşdiyi bir milyonluq qaçqın və məcburi köçkün probleminə biganə münasibət bəslənməsinin fəsadlarıdır. O zamanlar Azərbaycanın məcburi köçkün soydaşlarımızın sosial problemlərini öz imkanları daxilində həll edə bildiyi xatırladılır.

Dünyanın dini liderlərinə, parlamentlərinə, beynəlxalq təşkilatlara və İnsan hüquqları üzrə Avropa Məhkəməsinə müraciət edən konfessiya rəhbərləri onları Azərbaycan xalqına qarşı erməni ekstremistlərinin təcavüzünə və vəhşiliklərinə prinsipial siyasi, hüquqi qiymət verməyə, Xocalıda törədilən cinayəti soyqırım aktı kimi tanımağa çağırırlar.

Müraciəti Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə, Bakı və Azərbaycan Arxiyepiskopu Aleksandr və Azərbaycandakı Dağ Yəhudiləri icmasının rəhbəri Melih Yevdayev imzalayıblar. -0-