�Azərsu�nun susqunluğunun arxasındakı korrupsiya

Bakı/13.05.19/Turan: Turan İnformasiya Agentliyi agentliyin informasiya sorğusuna cavab vermədiyinə görə "Azərsu" ASC-ni məhkəməyə verib.

"İnformasiya azadlığı" haqqında qanuna görə, cavab sorğu alındıqdan sonra 7 gündən gec olmayaraq təqdim edilməlidir. Digər qurumlar kimi, "Azərsu" da qanunun bu tələbini kobud şəkildə pozur. Agentlik aylarla cavabdehlərin informasiya sorğularına cavab verməsini gözləyir. Məsələn, suölçən cihazların qiymətinin yüksək olmasının səbəbləri ilə bağlı "Azərsu"dan cavab almaq üçün 11 məhkəmə iclas lazım olub.

İndiki informasiya sorğusunun səbəbi "Azərsu"nun növbəti dəfə cavabdan yayınması ilə bağlıdır. Məsələnin tarixçəsi belədir ki, uzun müddətdən və bir sıra məhkəmə dinləmələrindən sonra Buzovna qəsəbəsində su kəməri sistemlərinin tikintisi haqda agentliyin 2018-ci il 19 sentyabr sorğusuna "Azərsu" 2018-ci il dekabrın 11-də cavab verdi. Lakin "Azərsu" sədrinin müavini Etibar Məmmədovun cavabı natamam, anlaşılmaz idi və dəqiqləşdirmə tələb edirdi. Bununla əlaqədar 2019-cu ilin yanvarında agentlik məktub göndərərək bəzi məsələlərə aydınlıq gətirilməsini xahiş etdi. Ancaq cavab olmadı. Yanvarın 29-da "Uzunluğu 222 il olan su kəməri" məqaləsi dərc edildi. Şirkətin reaksiyası "0" oldu.

http://www.turan.az/ext/news/2019/1/free/Social/ru/78415.htm

Belə olduğu halda aprelin 2-də Turan İA-nin direktoru Mehman Əliyev tərəfindən "Azərsu" ASC-nin sədri Qorxmaz Hüseynova məktub göndərildi. Məktubda deyilirdi: "Reaksiyanın olmaması ilə əlaqədar jurnalist araşdırması aparmaq qərarına gəldim. Bununla əlaqədar sizdən aşağıdakı suallara cavab verməyinizi xahiş edirəm:

1.Buzovna qəsəbəsində su kəmərinin və kanalizasiya sisteminin çəkilişi üzrə layihənin ictimaiyyətə açıqlanması üçün onun tam sənədləşdirilməsini Turan agentliyinə təqdim edə bilərsinizmi?

2. .Layihənin hansı müddətdə icrası təsdiqlənib (başlanğıcı və sonu) və kim tərəfindən?

3. . Layihəyə əsasən "Azərsu" ASC-yə 122 mln. 730 min manat ayrılıbmı? Əgər ayrılıbsa niyə xərclənməyib? Əgər ayrılmayıbsa niyə?

4. Layihə hansı müddətdə icra olunacaq?

5. Niyə içməli su ilə ilk növbədə keçmiş Buzovna sovxozunun ərazisində qanunsuz tikilmiş evlərin sakinləri, Buzovna sahilindəki yüksək vəzifəli şəxslərin bağ evləri təmin olunub, yüzillik tarixə malik köklü Buzovna əhalisi yox?

6."2011-2013-cü illərdə Bakı şəhərinin və onun qəsəbələrinin sosial-iqtisadi inkişafı üzrə Dövlət Proqramı" çərçivəsində Buzovnanın içməli su ilə təmin edilməsi layihəsi və "2014-2016-cı illərdə Bakı və ətrafyanı qəsəbələrin sosial-iqtisadi inkişafı üzrə Dövlət Proqramı" həyata keçirilirmi?

7. 2013-cü il dekabrın 23-də prezident İlham Əliyevin sədrliyilə konfrans keçirilmişdi. Konfrans Bakı şəhərinin və onun qəsəbələrinin sosial-iqtisadi inkişafı üzrə Dövlət Proqramının icrasının yekunlarına həsr olunmuşdu. Siz orada dediniz ki, 2013-cü ilin avqustunda Ceyranbatan-Balaxanı-Qala magistral boru kəmər istismara verilib ki, bu da bütün şəhərətrafı qəsəbələri davamlı su təchizatı ilə təmin edəcək. Lakin Buzovna, Mərdəkan və digər qəsəbələrin vəziyyəti göstərir ki, bu, belə deyil. Niyə reallıq sizin hesabatla üst-üstə düşmür?

8. Sözügedən iki proqram çərçivəsində su təchizatı və kanalizasiya üçün nə qədər pul ayrılıb və nə qədər mənimsənilib?

9. 2013-cü il 23 dekabr konfransında siz bildirdiniz ki, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafı üzrə Dövlət Proqramı" çərçivəsində Bakı şəhəri və ətraf qəsəbələrin əhalisinin 78%-i fasiləsiz içməli su ilə təmin edilib. "2014-2016-cı illərdə Bakı və ətrafyanı qəsəbələrin sosial-iqtisadi inkişafı üzrə Dövlət Proqramı"nın reallaşması nəticəsində bu göstərici necə dəyişməliydi? Hazırda bu göstərici necədir?

10. Sözügedən iki proqram çərçivəsində Xəzər rayonu ərazisində yeni kanalizasiya boru kəmərlərinin çəkilişi müşahidə olunmayıb, halbuki, işlər planlaşdırılıb, vəsait ayrılıb. Niyə işlər yerinə yetirilməyib və vəsait hara xərclənib?

Məktuba məqalə əlavə edilib. Q.Hüseynov cavab verməyib.

Agentlik qanunla müəyyən olunmuş qaydada cavaba nail olacaq, belə ki, şirkətin fəaliyyətində korrupsiya elementlərini görür. Bu, "Korrupsiyaya qarşı mübarizə haqqında" qanuna əsasən də özünü göstərir: vəzifəli şəxsin aşağıdakı hərəkətləri korrupsiya üçün şərait yaradan hüquq pozuntuları sayılır: fiziki və ya hüquqi şəxs qanunla və ya digər normativ-hüquqi aktlarla nəzərdə tutulmuş məlumatların təqdim olunmasından əsassız olaraq imtina edir, məlumatların təqdim olunmasını gecikdirir, natamam və ya təhrif edilmiş məlumat təqdim edir (Maddə:9.3.8.).

"Son vaxtlar praktika göstərir ki, məhkəmələr az qala cavabdehlərin vəkilləri rolunda çıxış edir: cavabları yubadır və ya ondan imtina edir, cavabdehlərin barəsində qərar çıxarmaqdan, onları cəzalandırmaqdan imtina edirlər.

Belə olan şəraitdə jurnalistlər məqalələrin, xüsusilə də araşdırma xarakterli yazıların hazırlanmasında böyük çətinliklərlə üzləşirlər. Və bütün bunlar baş verir, baxmayaraq ki, informasiya sorğularına cavab verilməməsinə görə cəzalar sərtləşdirilib, cərimələrin məbləği artırılıb, - Turan İA-nın direktoru Mehman Əliyev qeyd edir.0--