Bakı metrosu yay qrafikinə keçir

"Bakı Metropoliteni" QSC iyul ayının 1-dən metropolitendə qatarların hərəkəti ilə bağlı yay qrafikinə keçir. Bu barədə metropolitenin iyunun 29-da yaydığı məlumatda deyilir.

"Tədris mövsümünün başa çatması, eləcə də paytaxt sakinlərinin yay istirahətini şəhərdən kənarda keçirmələri metropolitendə sərnişin axınının əhəmiyyətli dərəcədə azalmasına səbəb olur. Bu səbəbdən hər il olduğu kimi, Bakı metropolitenində qatarların hərəkət qrafikində dəyişikliklər ediləcək", - məlumatda deyilir.

Mövsümi qrafikə uyğun olaraq, qatarlararası intervallar cüzi artırılacaq, belə ki, sərnişinlərin əsas axın saatlarında "Həzi Aslanov" stansiyasından "28 May" stansiyasına qədər və əks istiqamətdə hərəkət edən qatarlar arasındakı interval qış dövründə olduğu kimi, 2 dəqiqə deyil, 2,5 dəqiqə təşkil edəcək.

Məlumatda deyilir ki, sərnişinlərin az olduğu səhər erkən və axşam saatlarında bu sahədə 3 dəqiqə və daha çox intervala hesablanmış hərəkət tərtib ediləcək.

Xətlərin "28 May" stansiyasında bir-biri ilə birləşməsini nəzərə alaraq, bu stansiyadan "İçərişəhər" və "Dərnəgül" stansiyalarına doğru qatarlar arasında interval müvafiq olaraq, gur saatlarda 5, başqa vaxtlarda 6 dəqiqə və daha çox olacaq.

Yay qrafiki yeni tədris ilinin başlanmasına kimi qüvvədə qalacaq.

Xatırladaq ki, Bakı metrosu 1967-ci ildən fəaliyyət göstərir. 22 stansiyaya malikdir.

Azərbaycanda tədris ili sentyabrın 15-dən başlayaraq iyunun 15-nə kimi davam edir.--0--