Bakıda xəbər agentlikləri konqresi açılıb

25 illik müstəqillik göstərib ki, ölkədə mətbuat azadlığı və digər azadlıqlar təmin edilib, bu barədə İlham Əliyev çərşənbə günü Bakıda Xəbər Agentliklərinin V Dünya Konqresinin açılışında bildirib.

Turan-ın məlumatına görə, tədbirdə dünyanın 80 ölkəsindən 100-dən çox xəbər agentliyini təmsil edən 200-ə yaxın qonaq iştirak edir.

Dövlət başçısı bildirib ki, Azərbaycan müasir, dinamik ölkədir, müsbət beynəlxalq imici var, bu, bir neçə il əvvəl Azərbaycanın BMT Təhlükəsizlik Şurasının qeyri-daimi üzvü seçildiyi zaman sübutunu tapıb.

“Bu, məsuliyyətli, etibarlı tərəfdaş kimi Azərbaycana dəstək idi”, deyən Əliyev hesab edir ki, Azərbaycan eyni zamanda Avropa Şurasının və İslam Əməkdaşlıq Təşkilatının üzvü olan azsaylı ölkələrdən biridir.

“2008-ci ildə Azərbaycan Bakıda Avropa və İslam ölkələrinin mədəniyyət nazirlərinin toplantısını təşkil edib. Bu, tarixi nailiyyət idi və sonradan bu “Bakı prosesi” adlandırılıb.

Azərbaycanda çoxmədəniyyətlilik haqqında danışan İlham Əliyev bu yaxınlarda Roma Papası Fransiskin Bakıya səfərini xatırladıb.

Daha sonra Əliyev Ermənistanla münaqişə, BMT TŞ-nin 4 qətnaməsi, işğal edilmiş ərazilərdə abidələrin dağıdılması haqqında danışıb.

“Dağlıq Qarabağ münaqişəsi Azərbaycanın ərazi bütövlüyü çərçivəsində həll edilməlidir. Ölkəmizin də, digər ölkələrin də ərazi bütövlüyü dəyərlidir”, deyə o bildirib. -71D-