Baş Prokuroluq saxta sənədlərlə xaricdə oturum izni alanları axtarır

Bakı/14.12.17/Turan: Azərbaycan Baş Prokurorluğunun Ağır Cinayətlərə dair İşlər üzrə İstintaq İdarəsi Azərbaycanın bəzi vətəndaşlarının xarici dövlətlərdə "siyasi sığınacaq" adı altında "oturum icazəsi" almasına dair cinayət işinin istintaqını davam etdirir. Bu xəbəri Baş Perokuroluq yayıb.

"Bu cinayət işi xarici dövlətlərdə "siyasi sığınacaq" adı altında "oturum icazəsi" almaq məqsədilə guya Azərbaycanda hüquqlarının pozulması, siyasi baxışlarına, sosial mənsubiyyətlərinə görə təqib olunmaları haqqında hüquq verən rəsmi sənədlərin istifadə məqsədilə saxtalaşdırılması, qanunsuz miqrasiyanın təşkili və sair faktlar üzrə başlanmış cinayət işinin istintaqıdır".

Açıqlamada deyilir ki, istintaq qrupu Bakı şəhər sakini Rauf Hüseynovun 2017-ci ilin mayında ölkəni tərk etməsini araşdırıb.

Baş prokuroluğun açqılamasına görə, R.Hüseynov barəsində hər hansı araşdırma, cinayət təqibi və cinayət məsuliyyəti olmadığı halda, xarici ölkədə oturum izni almaq üçün yalan məlumatlar verib: "Hüquq-mühafizə orqanları tərəfindən təqib olunmaları, Nəsimi Rayon Polis İdarəsi və struktur qurumlarında araşdırma materialı və cinayət işinin mövcudluğu, həyat yoldaşı Amaliya Seyidova ilə birgə polis idarəsinə çağırılmaları, şübhəli şəxs qisimində istintaqa cəlb edilərək ona qarşı ittiham irəli sürülməsi barədə məlumatlar daxil edilib.

Açıqlamaya görə, R.Hüseynov xaricə getmək üçün saxta blank, möhür əksləri və imzalardan istifadə edib.

Bundan irəli gələrək, R.Hüseynova Cinayət Məcəlləsinin 320.1 (rəsmi sənədləri, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə) və 320.2-ci maddələri ilə məhkəmənin qərarı ilə həbs qətimkan tədbiri seçilməklə barəsində "İnterpol" xətti ilə beynəlxalq axtarış elan edilib.

Açıqlamada xaricdə belə saxta yolla oturum izni alan digər şəxslərin də əməllərinin müəyyən olunması üçün istintaqın davam etdiyi bildirlir.