Cavid Şirəliyevin doğum günü qeyd olunub

Bakı/11.11.17/Turan: Noyabrın 11-də siyasi məhbus ailələrinin üzvləri, KİV və vətəndaş cəmiyyətinin nümayəndələri www.7gun.az saytının baş redaktoru, siyasi məhbus Cavid Şirəliyevin 37 yaşını qeyd ediblər.

Doğum günü tədbirini Siyasi Məhbusları Müdafiə Mərkəzi (SMMM) keçirib. Belə ki, qurum siyasi məhbuslar və onların ailələri ilə həmrəylik nümayiş etdirərək siyasi məhbusların doğum günlərini qeyd edir.

"Bu gün biz cəsarətli və insan azadlığı ideallarına sadiq vətəndaşın doğum gününü qeyd edirik. O, ədalətə olan sonsuz inamı ilə bizi söz azadlığı və demokratiya uğrunda mübarizəyə ruhlandırır", - "Xural" qəzetinin baş redaktoru, SMMM-in üzvü Əvəz Zeynallı bildirib.

Çıxışlar zamanı təbriklərlə yanaşı siyasi məhbusların azadlığa buraxılmasına və bu problemin həlli üçün cəmiyyətin səylərinin konsolidasiyasına çağırışlar səslənib.

İkiqat təbrik isə C.Şirəliyevin anası Zahirə xanımın ünvanına səslənib. Oğlu ilə yanaşı, eyni gündə onun da 60 yaşı tamam olur. Bu mərd qadın Cavidin müdafiəsi üçün çox işlər görüb və siyasi məhbus ailələri cəmiyyətinin fəal üzvüdür.

Ənənəyə görə, tədbir iştirakçıları üzərində səbəbkarın portret rəsmi olan tortun dadına baxıblar, ancaq hörmət əlaməti olaraq rəsmin özünə toxunmayıblar.

Cavid Şirəliyev 2015-ci il mayın 20-də CM-in 182.2.4-ci maddəsi ilə (pul tələb etmə) 5 il azadlıqdan məhrum edilib. O, günahını etiraf etməyib.

C.Şirəliyev əxlaqsızliq yuvası haqda tənqidi məqalə yazıb, ancaq məqalədəki əsas personaj sübutsuz olaraq onu pul tələb etməkdə suçlayıb.

C.Şirəliyev siyasi məhbus kimi tanınıb və SMMM-in siyahısına daxildir.-0-