![Cəlilabad xəstəxanasında karantində saxlanılanlar şəraitin olmadığından şikayətlənirlər (Video)](https://turan.az/resized/media/2020/main/022900024288-750-500-resize.webp)
Cəlilabad xəstəxanasında karantində saxlanılanlar şəraitin olmadığından şikayətlənirlər (Video)
Bakı/29.02.20/Turan: Koronavirus şübhəsilə Cəlilabad rayon xəstəxanasına yerləşdirilən adamlar bu klinikada saxlanma şəraitindən şikayətlənirlər.
Ötən gün xəstəxana DİN xüsusi təyinatlı dəstələrinin mühafizəsinə götürülmüşdü. Karantində olanlara və onların yaxınlarına qarşı güc tətbiq edilmişdi.
Xəstəxanada saxlanılanlar antisanitariyanın hökm sürdüyünü, maska, baxil, qab-qacaq və gigiyena vasitələrinin olmadığını bildiriblər. Bəzi palatalarda su yoxdur, hər hansı tibbi müayinə aparılmır.
Fevralın 27-də xəstəxanaya yerləşdirilən Fariz Əliyev bildirib ki, 11 tələbə ilə birlikdə İrandan qayıdarkən karantinə alınıb. Onun sözlərinə görə, xəstəxanada duş yoxdur, tualetlərdə su yoxdur, verilən yemək keyfiyyətsizdir.
“Bunu karantin adlandırmaq mümkün deyil. Maskalarımız yoxdur, əlcək verilmir. Çarpayılar dəhşətli vəziyyətdədir. Bizə deyirlər: “Olanımız budur”. Burada hətta sağlam insanlar xəstələnər. Doğmalarımız narahatdır. Buradan çıxmaq istəyirik”, - o deyib.
Onun sözlərinə görə, polis xəstəxanada etiraz edən tələbələrin valideynlərinə qarşı güc tətbiq edib.
Lakin DİN mətbuat xidmətinin rəhbəri Ehsan Zahidov polis qüvvələrinin xəstəxanaya cəlb olunmasını təkzib edib.
Tibbi Ərazi Bölmələrini İdarəetmə Birliyinin mətbuat xidmətinin rəhbəri Rəvanə Əliyeva Turana bildirib ki, karantində saxlanılan vətəndaşlar lazım olan hər şeylə təchiz olunublar. “Hər şey yüksək səviyyədədir. Sadəcə, karantində saxlanılanlar oradan çıxmaq istəyir, amma onlar da vəziyyəti anlamalıdır ki, biz bütün bu tədbirləri birinci növbədə onlar üçün həyata keçiririk”, - o bildirib.
Bundan öncə Astara xəstəxanasında saxlanılanlar da şəraitin pis olduğunu bildiriblər.
Müxtəlif hesablamalara görə, ölkə xəstəxanalarında 200-dən çox adam koronavirus şübhəsi ilə karantindədir. Koronavirusa yoluxmuş Rusiya vətəndaşı Azərbaycandakı klinikalardan birində təcrid edilib.—21D-
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz