Daha bir jurnalist Əfqan Muxtarlının işi üzrə dindirilib

Bakı/21.06.17/Turan: Bu gün müstəqil jurnalist Natiq Cavadlı Baş Prokurorluğun Ağır Cinayətlər üzrə İstintaq İdarəsində üç saata yaxın dindirilib.

Dindirmə jurnalist Əfqan Muxtarlı və "Meydan" TV İnternet resursun fəaliyyəti üzrə cinayət işilə bağlı olub.

Jurnalistdən dindirmənin açıqlanmaması barədə iltizam alınıb.

Bundan öncə jurnalistlər Sevinq Vaqifqızı, Xədicə İsmayılova, Müsavat Partiyasının keçmiş və indiki rəhbərləri İsa Qəmbər və Arif Hacılı, təşkilatın aparat rəhbəri Gülağa Aslanlı Ə.Muxtarlının işi üzrə dindiriliblər.

Hakimiyyət Ə.Muxtarlını xaricdən Azərbaycandakı müxalifətçilərə pul ötürməkdə ittiham edib. İndi də bu fəaliyyəti sübut etməyə və bunu dövlət quruluşunun pozulması, Qərbin ölkənin daxili işlərinə müdaxiləsi kimi təqdim etmək istəyir.

Şərhçilər qeyd edirlər ki, pulun Gürcüstanda alınması və onun Azərbaycanda ötürülməsi barədə məlumatlar ancaq rəsmi Tbilisinin köməyilə əldə edilə bilər.

* Əfqan Muxtarlı mayın 29-da Tbilisidə oğurlanıb və Azərbaycan hakimiyyətinə təhvil verilib. Jurnalist sərhəddi qanunsuz keçmək, qaçaqmalçılıq və sərhədçiyə müqavimət göstərməkdə ittiham edilib.

Ötən həftə Avropa Parlamenti qətnamə qəbul edərək Əfqan Muxtarlının azadlığa buraxılmasını tələb edib.-06B--