DAK həmsədri Sabir Rüstəmxanlı: Vahid DAK ətrafında birləşək

Dünya Azərbaycanlıları Konqresinin (DAK) həmsədri, deputat Sabir Rüstəmxanlı DAK-la bağlı duruma dair xalqa müraciət ünvanlayıb.

Qurumun növbəti qurultaya hazırlaşdığı qeyd olunub. Buna baxmayaraq, DAK-dan kənar bir qrup şəxsin də DAK adı ilə fəaliyyət göstərdiyi nəzərə çatdırılıb. Bu kiçik qrupun DAK adı ilə fəaliyyət göstərməsinin qurumun fəaliyyətinə zərbə vurduğu iddia edilir.

Müəlliflər müraciəti yaymaqda məqsədlərinin kimin haqlı və ya kimin haqsız olduğunu sübut etmək yox, ümumi fəaliyyət prinsiplərini müəyyən etmək olduğunu bildirirlər. Kimlərinsə qurumu tərk etməsinin başa düşülən olduğunu qeyd edən müəlliflər bu şəxslərin eyniadlı altrernativ qurum yaratmalarının anlaşılmaz olduğunu vurğulayırlar. 

Quruma eyniadlı alternativ qurumlar yaradılmasının arxasında təkcə fərdlərin yox, həm də müəyyən siyasi qüvvələrin maraqlarının durduğu iddia edilib. Bu qüvvələrin hər yeni dönəmdə yeni problemlər yaradacaqları xəbərdarlığı edilir.

Güney Azərbaycandakı proseslərin, quzeydə müstəqilliyi təhdid edən açıq və gizli qüvvələrin meydan sulaması hamının vahid və güclü təşkilatda birləşməsini zərurətə çevirdiyini bəyan edirlər.

“Buna görə də mən DAK-ın bütün köhnə üzvlərinə, hüquqi əsas oldu-olmadı DAK adı ilə fəaliyyət göstərən alternativ qurumlara müraciət edərək, onları real birlik yolunu axtarmağa dəvət edirəm, ən qısa müddətdə bu birləşmək, bütün milli-vətənpərvər qüvvələri bir araya gətirmək istəyinə münasibət bildirmələrini rica edirəm”, - deyə DAK-dan kənarda qalan qüvvələrə çağırış olunur.

Müəlliflər son illər DAK-ı parçalamaq istəyənlərin bütün ümidlərini puç etməyə çağırırlar. Vahid DAK ətrafında birləşməyin çağdaş dünya təcrübəsinə uyğun mübarizəyə yeni güc, yeni mübarizə imkanları qata biləcəyi nəzərə çatdırılır.

Müəlliflər “bütöv vətən” mübarizəsinin səmimi birlik və bərabərlik, çağdaş dünya düzəninə uyğun yorulmadan mübarizə aparmaq tələb etdiyi önə çəkilir.

DAK 1996-cı ildə ABŞ-da təsis edilib. Daha sonra 1998-ci ildə qurultayı keçirilib. İlk dəfə DAK daxili parçalanmalar buradan başlanıb. C.Derəxtinin DAK-a sədrliyi dönəmindən DAK rəhbərliyinə ittihamlar güclənib. Qurum rəhbərliyi bir-birini xəyanətdə, İrana casusluqda ittiham edir.

2005-ci ildən sonra DAK rəhbərliyinə S.Rüsətmxanlının gəlməsilə ittihamlar müəyyən müddətə səngisə də, son 2-3 ildə parçalanmalar baş verib. Hər biri 305 nəfərlik qruplar eyniadlı bir neçə alternativ DAK təsis ediblər. Bundan irəli gələrək, S.Rüstəmxanlı adı çəkilən müraciəti yayıb.

DAK-ın hədəfi İranda yaşayan 35 milyon nəfər Azərbaycan türkünün milli və insani haqlarını əldə etməsinə dəstək verməkdir. -05D-