DİN Xızıda yol qəzasında yaralananların və həlak olanların siyahısını dərc edib (YENİLƏNİB)

Azərbaycan DİN dünən Xızıda baş vermiş yol qəzasında yaralananların və həlak olanların siyahısını öz saytında dərc edib.

Məlumata görə, mayın 29-da saat 19:00-a yaxın Xızı rayonunun Qızıl-Qazma qəsəbəsi ərazisində Sumqayıt sakini Zaur Şirinovun idarə etdiyi Hunday markalı avtobus yarğana düşüb. Nəticədə Büllurə İsmayılova (1963-cü ildə anadan olub) və Kamil Həziyev (1984) hadisə yerində həlak olublar.

Sürücü və digər 23 sərnişin xəstəxanaya yerləşdirilib. Yaralılardan biri – Sərxan Abdullayev (1950-ci il) xəstəxanada vəfat edib.—16D-

2016 May 30 (Bazar ertəsi) 12:55:20

  Xızı rayonunda baş vermiş ağır yol qəzasında həlak olanların sayı 3 nəfərə çatıb.

Xatırladaq ki, Sumqayıt Dövlət Texniki Kollecinin müəllim və tələbələrinin olduğu avtobus yarğana düşüb. İki müəllim hadisə yerində həlak olub. Səhiyyə Nazirliyinin mətbuat xidmətinin rəhbəri Liya Bayramova Turan-a bildirib ki, daha bir nəfər Sumqayıt  xəstəxanasında vəfat edib.

Sumqayıt xəstəxanasına 8 nəfər aparılıb. Onların ikisinə tibbi yardım göstərildikdən sonra evə buraxılıb.

Hazırda xəstəxanada 5 nəfər var. Onların birinin vəziyyəti ağırdır.

L.Bayramova bildirib ki, 11 nəfər Siyəzən Diaqnostika Mərkəzinə yerləşdirilib.  Səhiyyə naziri Oqtay Şirəliyev hazırda oradadır. O, yaralılara baş çəkib, onların müalicəsi ilə bağlı müvafiq tapşırıqlar verib.

Ola bilsin ki, yaralıların bəzisi ixtisaslaşdırılmış klinikalarda tibbi yardım almaq üçün Bakıya gətirilsin.

Xızı Rayon Prokurorluğunda CM-in 263.3 maddəsi (ehtiyatsızlıqdan iki və ya daha çox şəxsin ölümü) ilə cinayət işi başlanıb.—06D--

2016 May 29 (Bazar) 22:20:02

Xızı rayonunda baş vermiş ağır yol qəzasında iki nəfər həlak olub, 20-dən çox adam yaralanıb. Sumqayıt Dövlət Texniki Kollecinin müəllim və tələbələrinin olduğu avtobus yarğana düşüb. Yaralıların daşınması üçün Xızı və Siyəzən rayon təcili yardım briqadaları cəlb edilib. Yaralılar Siyəzən Diaqnoz Mərkəzinə aparılıb. Bu barədə Xızı hüquq-mühafizə orqanlarındakı mənbə bildirib. Qeyri-rəsmi məlumatlara görə, həlak olanlardan biri kollecin müəllimidir.

Avtobus sərnişinləri Altıağacdan gətirirmiş.06D--