Dövlət Bayrağı Meydanının keçmiş rəhbəri azadlığa çıxıb (yenilənib)

Bakı Ağır Cinayətlər Məhkəməsində hakim Əlövsət Abbasovun sədrliyi ilə keçirilən Dövlət Bayrağı Meydanı Kompleksinin sabiq rəisi Rəşad Məmmədov və digərlərinin cinayət işi üzrə prosesdə dövlət ittihamçısı R.Məmmədov və İsfəndiyar İsfəndiyarovun həbsdə keçirdiyi müddəti nəzərə aaraq, onları azad etməyi təklif edib. Məhkəmə prokurorun təklifini nəzərə alaraq qərar çıxarıb və məmurları məhkəmə zalından azadlığa buraxıb.

Xatırladaq ki, Dövlət Bayrağı Meydanı Kompleksinin sabiq sədri Rəşad Məmmədov və bu işlə əlaqədar olan İsfəndiyar İsfəndiyarov və Arzu Məmmədov 2015-ci ilin yazında həbs edilib.

Rəşad Məmmədov Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə), 179.3.2-ci (mənimsəmə və ya israf etmə, külli miqdarda törədildikdə) və 308.2-ci (Vəzifə səlahiyyətlərindən sui-istifadə, bu əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə) maddələri ilə ittiham olunur. İ.İsfəndiyarov və A.Məmmədov isə Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham olunurlar.

Dövlət ittihamçısı yumşaldıcı halları (ziyanın ödənilməsi) nəzərə almaqla, R.Məmmədov, İsfəndiyarov və A.Məmmədov barəsində hökmü yumşaltmağı və onları 1 il 1 ay müddətinə azadlıqdan məhrumetmə cəzasına məhkum etməyi, onların bu müddəti həbsdə keçirdiklərini nəzərə alaraq məhkəmə zalından azadlığa buraxmağı təklif edib.

Müdafiə tərəfi məhkəmədən təqsirləndirilən şəxslərə bəraət verməyi xahiş edib, bu barədə Turan-a vəkil Akif Əlizadə məlumat verib.

Məhkəmə bütün təqsirləndirilənlərin 1 il 1 ay azadlıqdan məhrum edilməsi barədə hökm çıxarıb. Bu zaman hakim R.Məmmədova məxsus bir kommersiya obyektinin dövlətin xeyrinə müsadirəsi haqqında qərar çıxarıb. Məhkəmə bütün təqsirləndirilən şəxslərin məhkəmə zalından azadlığa buraxılması barədə hökm çıxarıb.

Qeyd edək ki, Məmmədov yenidənqurma işlərinin həyata keçirilməsi zamanı böyük məbləğdə vəsaitin mənimsənilməsinə görə 12 ilə qədər azadlıqdan məhrum edilə bilərdi. Amma hakimiyyət tənqidçilərinə qarşı sərt olan prokurorluq gözlənilmədən hələ bu yaxınlarda hakimiyyətyönlü mətbuatın “milli satqınlıq” damğası vurduğu keçmiş dövlət məmuruna qarşı yumşaqlıq göstərib. Məhkəmə də gözlənilmədən “insaflı” qərar çıxarıb. -06D-

Rəy yaz

Cəmiyyət

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti