Əbdül Əbilov: Azərbaycan böyük bir həbsxanadır (YENİLƏNİB)

Facebook fəalı Əbdül Əbilovun 5,5 il müddətinə azadlıqdan məhrum edilməsi haqqında hökmdən apellyasiya şikayəti verilib, bu barədə Turan-a vəkil Xalid Bağırov bildirib.

O qeyd edib ki, qanunsuz narkotik ticarəti ittihamı tamamilə saxtalaşdırılıb və siyasi motivlidir.

Çərşənbə axşamı məhkəmədə yekun çıxışında vəkil deyib ki, Əbilovu saxlayan əməliyyatçılar məhkəmənin icazəsi olmadan axtarış apararaq, səlahiyyətlərini aşıblar.

Əbilov 22 noyabr 15.00-da evinin önündə saxlanılıb və əlinə qandal taxılaraq DİN-in Mütəşəkkil Cinayətkarlığa qarşı Mübarizə Baş İdarəsinə aparıblar. Daha sonra geri gətiriblər və axtarış aparıblar. Şahid – qarşıdakı mağazanın sahibi də məhkəmədə bunu təsdiq edib.

Axtarışdan sonra onu yenidən qaynı Ramil Əhədovla birlikdə MCMBİ-yə aparıblar. Orada onları facebook-da “Yaltaqlara dur deyək!” səhifəsi haqqında sorğu-sual ediblər.

Daha sonra Əbilova təzyiq göstəriblər ki, narkotik ticarəti ilə məşğul olduğunu etiraf etməsə, Əhədovu da həbs edəcəklər. Bu tələb yerinə yetirildikdən sonra Əhədovu sərbəst buraxıblar.

Bağırovun fikrincə, polis cəzasız qalacağından əmin olduğu üçün işi kobud şəkildə saxtalaşdırıb. Bu zaman o, İlham Əliyevin beynəlxalq təşkilatların tənqidinə baxmayaraq, polisi cəzalandırmayacağı haqqında bəyanatını xatırladıb.

Ümumiyyətlə isə MCMBİ əvvəllər də siyasi işlərlə məşğul olub və hökumət əleyhinə aksiyaların iştirakçılarını təqib edib.

İndi isə, facebook meydana çıxdıqdan sonra MCMBİ özünə yeni fəaliyyət sahəsi tapıb və indi sosial şəbəkələrin gənc fəallarını təqib edir. Facebook fəalları Rəşad Ramazanovun (Ağaaddin), Elsevər Mürsəllinin, Ömər Məmmədovun və indi də Əbdül Əbilovun cinayət təqibində məhz bu idarənin əli var.

Qeyd edək ki, təqsirləndirilən şəxs özü siyasi motivlərlə, İnternetdə məmurların yaltaqlığını tənqid etdiyinə və ələ saldığına görə təqib edildiyini bildirib.

Bu zaman o, keçmiş prezident Heydər Əliyevin qızı Sevil Əliyevanın bu yaxınlarda verdiyi müsahibəni xatırladıb. Əliyeva bildirib ki, vaxtilə Heydər Əliyevə satan insanlar indi həssaslaşır, kitablar yazır, onun adı ilə özlərinə piar yaratmağa çalışır.

Əbilov həmçinin bildirib ki, digər fəallar kimi, onu da hakimiyyəti tənqid etdiyinə görə təqib edirlər.

“Hakimiyyət onun qanunları ilə yaşamaları və əyilmələri, ya da ölkəni tərk etmələri üçün insanları qorxutmağa yönəlmiş repressiv siyasət yürüdür. Mənim babamı, din xadimini 1937-ci ildə güllələyiblər. İndi əcdadımıza qarşı repressiya törədənlərin nəsilləri bizi təqib edir”, deyə Əbilov bildirib.

Bununla belə, o bildirib ki, fəalları ədalətsiz mühakimə edən hakimlər və prokurorlar gec ya tez buna görə cavab verəcəklər. İnsan azadlıqda olsa belə, Azərbaycan böyük bir həbsxanadır.

Xatırladaq ki, noyabrın 22-də Əbilovun həbsi zamanı onun cibinə 2,679 qr heroin, mənzilinə isə 4,677 qr heroin atıblar. -06D-

2014 May 27 (Çərşənbə axşamı) 14:42:47

Mayın 27-də Bakı Ağır Cinayətlər Məhkəməsində Əhməd Quliyevin sədrliyi ilə 31 yaşlı fəal facebook istifadəçisi Əbdül Əbilova hökm oxunub.

Məhkəmənin hökmü ilə Əbdül Əbilov 234.4.3-cü (böyük ölçüdə narkotik vasitələrin qanunsuz saxlanılması və ya satışı) maddə ilə təqsirli bilinərək, 5 il 6 ay müddətinə azadlıqdan məhrum edilib.

Əbilov 22 noyabr 2013-cü ildə Yasamal rayonunda öz evinin yaxınlığında DİN-in Mütəşəkkil Cinayətkarlığa qarşı Mübarizə İdarəsinin (MCMİ) əməkdaşları tərəfindən saxlanılıb. Saxlanılarkən guya onun cibindən içərisində 2,679 qr heroin olan sellofan paket tapılıb, kirayə tutduğu evdə isə 4,677 qr heroin tapılıb.

Məhkəmədə gənc bildirib ki, siyasi motivlərlə və facebookda fəallığına görə həbs edilib.

Hüquq müdafiəçiləri Əbilovu siyasi məhbus hesab edirlər. -16/06C-