Əkrəm Həsənov prokurorluğun təzyiqlərinə məruz qalıb

Bakı/24.06.17/Turan: Bank üzrə ekspert, "Antikollektor" şirkətinin rəhbəri Əkrəm Həsənov ötən gün Baş Prokurorluq yanında Korrupsiyaya Qarşı Mübarizə İdarəsinə çağırılıb.

4 bank: Xalq Bank, Bank Respublika, Bank of Baku və Bank VTB-nin rəhbərliyi Ə.Həsənovdan Maliyyə Bazarlarına Nəzarət Palatasına şikayət edib.

Bu banklar belə hesab edirlər, Ə.Həsənov mətbuatda öz çıxışı ilə bank sisteminin nüfuzuna xələl gətirir. ( https://www.amerikaninsesi.org/a/iqtisadiyyat/3909935.html и http://xeberfakt.az/.../5559-qtisad-4-bankn-qaranlq-taleyindn....).

Ə.Həsənov Facebook səhifəsində yazıb ki, prokurorluq işçiləri ondan soruşublar ki,

"bank sistemindən oğurlanmış vəsaitlər" dedikdə konkret hansı cinayət tərkiblərini ehtiva edir?

"Mən də izah etdim ki, məsələn, dələduzluq, qanunsuz kredit alma, vəzifə səlahiyyətlərindən sui-istifadə, mənimsəmə və s", - Ə.Həsənov yazır.
Ekspert prokurorluğun sözügedən idarəsinə çağırılmağını əsassız hesab edir.

"Tutaq ki, lap mən bu bankların nüfuzuna zərər vurmuşam, məhkəməyə versinlər də məni, korrupsiya əməli yoxdur axı burada", - Ə.Həsənov vurğulayıb.

Amma dəvətə görə onlara təşəkkür edib, çünki özü elə bu idarəyə getmək istəyirmiş.

"Bank Standard"ın Kreditorlar Komitəsinin qərarı ilə Mərkəzi Bankın və Palatanın sözügedən bankı vaxtilə necə yoxlaması haqda araşdırmanın aparılması barədə Baş Prokurorluğa müraciət edəcəyik", -Ə.Həsənov yazıb.

Onun sözlərinə görə, prokurorluq əməkdaşları deyiblər ki, müraciəti göndərin. "Bir sözlə, danışdıq ki, gələn dəfə mən şikayətçi qismində qonaq gedəcəyəm", -Ə.Həsənov bildirib.

O həmçinin bildirib ki, ötən ilin martında Rüfət Aslanlı "Antikollektor"u bağlatdırmağa uğursuz cəhd edəndən sonra mənimlə görüşü zamanı xahiş edirdi ki, heç olmasa qurumun adını dəyişim ki, ictimaiyyətdə biabır olmasın.

"Rüfət Aslanlı mənə dedi: "Bilirəm ki, sən əqidəli adamsan, sənə hədə-qorxu gəlmək mümkün deyil, səni inandırmaq lazımdır".

Bu gün prokurorluğa çağırıldıqdan sonra Rüfət Aslanlının nəzərinə çatdırıram ki, mən elə həmin Əkrəm Həsənovam və məqsəd məni qorxutmaq idisə, tam əks nəticəyə nail oldu.

İndiyədək mənim Aslanlıya "yazığım gəlirdi", başa düşürdüm ki, Elman Rüstəmovla qarşıdurması var, ona görə də bütün qüsur və səhvlərini açıb-ağartmırdım. Amma o, ciddi səhvə yol verdi", - Ə.Həsənov qeyd edib.

Öz növbəsində Baş Prokurorluğun mətbuat xidməti bildirib ki, Ə.Həsənov banklardakı cinayət əməlləri barədə "əsassız fikirləri", əmanətçiləri öz depozitlərini geri götürməyə çağırması ilə əlaqədar dəvət edilib. Çünki bu, əhali arasında ajiotaja, əmanətlərin çıxarılmasına, maliyyə sistemində likvidlik probleminin yaranmasına və arzuolunmaz nəticələrə xidmət edir.

Ə.Həsənova rəsmi xəbərdarlıq edilib ki, əgər bu cür çağırışlara son qoymasa onun barəsində ciddi tədbirlər görüləcək.

Qeyd edək ki, ekspert Ə.Həsənov son vaxtlar KİV-ə müsahibəsində bildirir ki, problemli kreditlər təminatsız vəsait verən, faktiki olaraq onları mənimsəyən bank sahiblərinin və menecerlərin günahı üzündən yaranıb.

O kreditlərin verilməsinin yoxlanmasını və borcların bank sahiblərindən tutulmasını təklif edib.

Həmçinin Ə.Həsənov iflasa uğramış bankların ləğvi prosesi şəffaf olmadığına görə Əmanətlərin Sığortalanması Fondunu tənqid edib. -06D-