Ekspert: İntiharların sayını azaltmaq olar

Bakı/06.08.18/Turan: "Son illərdə intiharlara cəhd halları çoxalıb, halbuki, bu, şərq və cənub ölkələri üçün o qədər də xas olan hal sayılmaz". Bunu psixoloq Azad İsazadə ölkədə intiharlarla bağlı durumu şərh edərkən bildirib.

Onun sözlərinə görə, intihara təkrar cəhd etmək halları da var. Belə ki, intihara cəhddən sonra psixoloji yardım göstərməli, şəxs müəyyən müddət psixoloq nəzarətində olmalıdır: "Deməli, hələ şəxsi intihara qalxmaqdan azad etmək onu xilas etmək sayılmır, onu intihara aparan səbəblər aradan qaldırılmalıdır. Bu səbəb aradan qalxmadıqca intiharı aradan qalxmış saymaq olmaz. Bu işlə həm də peşəkarlar məşğul olmalıdır. Burada yaş qrupları var, risk qrupları var, səbəb çoxluğu var".

A.İsazadə hesab edir ki, bu sahədə probemlərdən biri intiharları araşdıran mərkəzin olmamasıdır:

"Səhiyyə bunu fiziki xəstəlik saymadığı üçün məşğul olmur, Daxili İşlər Nazirliyi statistikanı aparır, Fövqəladə Hallar Nazirliyi kimsə özünü çaya, dənizə, atanda bundan xəbər tutur. Odur ki, vahid mərkəz yoxdur, araşdırılmır, bu məsələyə elmi yanaşma yoxdur".

A.İsazadə xatırladır ki, 2-3 il əvvələ kimi "kredit intiharları" var idi, indi azalıb, çünki bankların pullarını almaq üçün vətəndaşlara təzyiqləri azaldılıb.

Psixoloq hesab edir ki, heç bir halda intiharları tamamilə aradan qaldırmaq mümkün məsələ deyil, amma onun sayını azaltmaq olar, bu isə vahid mərkəz təşkili ilə mümkün ola bilər. -06D-