Elsevər Mürsəllinin apellyasiya şikayətinə baxılıb

Bu gün Sumqayıt Apellyasiya Məhkəməsində Mübariz Zeynalovun sədrliyi ilə narkotik ticarəti ittihamı ilə 5 il müddətinə azadlıqdan məhrum edilmiş facebook fəalı Elsevər Mürsəllinin apellyasiya şikayətinə baxılması prosesi başlayıb.

Prosesi müşahidə edən Vətəndaş Həmrəyliyi Partiyasının sədr müavini Samir Əsədli Turan-a bildirib ki, Mürsəlli təqsirsiz olduğunu və siyasi motivlərlə təqib olunduğunu bildirib.

Xatırladaq ki, 9 oktyabr 2013-cü il prezident seçkiləri zamanı Mürsəlli müxalifət namizədi Cəmil Həsənlini fəal şəkildə dəstəkləyib.

Gənc oktyabrın 3-də Xaçmazda saxlanılıb, polisə aparılıb və cibində “aşkar edilmiş” heroini vağzalda tapdığı haqqında protokol imzalamağa məcbur edilib.

Bu zaman ona sənədi imzaladıqdan sonra sərbəst buraxılacağını vəd ediblər. Lakin bundan sonra onu DİN-in Mütəşəkkil Cinayətkarlığa qarşı Mübarizə Baş İdarəsinə aparıblar.

Mürsəllinin atası, anası və qonşuları məhkəmədə gəncin 3 gün onlarla birlikdə meyvə topladığını və guya narkotiki tapdığı avtovağzalda olmasının qeyri-mümkün olduğunu təsdiq ediblər.

Məhkəmə iclası iyunun 24-də davam etdiriləcək.

Vəkil Xalid Bağırov Turan agentliyinə bildirib ki, müdafiə tərəfi təqsirsiz olduğuna görə Mürsəlliyə bəraət verilməsində israr edir. Xatırladaq ki, aprelin 3-də Bakı Ağır Cinayətlər Məhkəməsi onu 5 il müddətinə azadlıqdan məhrum edib.

Həbsindən sonra gənc NİDA hərəkatına daxil olub.

Mürsəllinin ittiham olunduğu 234.4.3-cü maddə sosial şəbəkə fəallarının təqibində getdikcə daha da məşhurlaşır. Belə ki, fəal blogerlər Rəşad Ramazanov, Əbdül Əbilov və Ömər Məmmədov da həmin maddə ilə ittiham olunaraq həbs ediliblər. -06В-