Əvəz Zeynallının işi üzrə prosesdə

“Xural” qəzetinin redaktoru Əvəz Zeynallının işi üzrə bugünki məhkəmə prosesində əsas şahidlərdən biri – Sumqayıtda avtomobil bazarının direktoru və Milli Dövlətçilik Partiyasının sədri Sabir Tanrıverdiyev çıxış edib.

Onun ifadələri ziddiyyətli olub və ibtidai istintaq zamanı verdiyi ifadələrdən fərqlənib.

Belə ki, Baş Prokurorluğunu Korrupsiyaya qarşı Mübarizə İdarəsinə verdiyi ifadələrdə o bildirib ki, Yevlaxın keçmiş icra başçısı (hazırda Gəncə icra başçısı) Elmar Vəliyevin adından qəzetin onun haqqında mənfi materialların dərc edilməsini dayandırması üçün Zeynallıya 2500 manat verdiyini bildirib.

Bu gün isə Tanrıverdiyev Zeynallıya pul vermədiyini, sadəcə ondan “hörmətli şəxslər” barədə mənfi materiallar yazmamağı xahiş etdiyini bildirib.

Lakin dövlət ittihamçısı Ramazan Hadıyevin replikalarından sonra Tanrıverdiyev “birdən xatırlayıb” ki, redaktor tənqidi məqalələrə son qoysa ona pul verməyi söz verib.

Digər şahid, Tanrıverdiyevin mətbuat katibi Hüseyn Əzizoğlu iddia edib ki, Zeynallı və Tanrıverdiyevin söhbətində iştirak edib və sonuncu ona kompüter almaq üçün pul verib.

Zeynallı bu iddiaları təkzib edib. Məhkəmə prosesi oktyabrın 3-ü  saat 15.00-də davam etdiriləcək. --06C-