Fərəməz Allahverdiyev həbsxanada əziyyət çəkir

4,5 müddətinə həbs olunmuş jurnalist Fərəməz Allahverdiyevin doğmaları onun səhhətinin pisləşdiyini bildirirlər.

Bazar ertəsi Media Mərkəzdə keçirilən mətbuat konfransında jurnalistin həyat yoldaşı Tahirə Allahverdiyeva bildirib ki, F.Allahverdiyevin bağırsaq problemi kəskinləşib, tez-tez arterial təzyiqi enir və güclü miqrendən əziyyət çəkir. 

Onun sözlərinə görə, ailənin maddi durumu o qədər pisdir ki, onun yanına gedə, yardım apara bilmirlər. Bakıda kirayə etdikləri evin pulunu 6 aydır ki, verə bilmirlər. T.Allahverdiyeva əvvəllər mağazada çalışıb, lakin iki ay öncə işdən çıxarıblar və hazırda heç yerdə işləmir. Himayəsində iki uşaq var, biri məktəbli, o biri tələbə. 

F.Allahverdiyev 2012-ci il aprelin 17-də həbs olunub. Avqustun 22-də Nizami Rayon Məhkəməsinin qərarı ilə 318 (sərhəddi qanunsuz keçmə) və 220-ci (kütləvi iğtişaşlara çağırış) maddələr üzrə 4,5 il müddətinə azadlıqdan məhrum edilib. Noyabrda F.Allahverdiyevin  apellyasiya şikayətinə baxılıb və məhkəmə çəkişməsindən imtina edilib. O, Apellyasiya Məhkəməsinin bu qərarından kassasiya şikayəti verib və bir ay ərzində bu şikayətə baxılmalıdır. 

Əslində F.Allahverdiyevin həbsi və mühakimə olunması siyasi motivlidir. Onun qardaşı Qurban Allahverdiyev belə hesab edir. Ona qarşı irəli sürülən ittihamların hamısı uydurmadır.  Bu ilin əvvəlində F.Abdullayev iki araşdırıcı məqalə yazıb və sosial şəbəkələrdə yerləşdirib. Birinci məqalə Azərbaycandan İtaliyaya gedən neftdən daxil olan gəlirlər, ikinci isə Rusiyadan Azərbaycana gətirilən mum şamlar barədə olub. O, öz materiallarında göstərib ki, bütün “izlər” prezidentin həyat yoldaşının ailəsinə gedir. Qardaşının fikrincə, Fərəməzin həbsinin əsl səbəbi də budur. 

F.Allahverdiyev 1988-ci ilin noyabrında “Azadlıq” meydanında Qarabağın müdafiəsi uğrunda aclıq aksiyasının əsas iştirakçılarından biri olub. O həbs olunub və bir neçə ay Moskvada Lefortovo istintaq təcridxanasında saxlanılıb. 

1997-cı ildə “tarixi abidələrin məhv edilməsinə”, konkret olaraq 1992-ci ildə Şərur rayonunda (Fərəməz İcra Hakimiyyətinin rəhbəri olub) Leninin abidəsinin sökülməsinə görə 2,5 il müddətinə azadlıqdan məhrum edilib.  

2007-ci ildə diffamasiya ilə bağlı növbəti həbs müddətində ədalətsiz hökmə etiraz olaraq həbsxanada ağzını tikib. 

2009-cu ildə 148 (təhqir) və 147.2-ci (ağır cinayətin törədilməsi barədə böhtan) maddələr üzrə üç ay müddətinə azadlıqdan məhrum edilib.—04C—