QİÇS-ə yoluxanların problemləri nədir?

Avropa İttifaqının Azərbaycan nümayəndəliyi QİÇS-ə (SPİD) qarşı mübarizə ilə bağlı bazar ertəsi “Hilton” otelində tədbir keçirib.

Nümayəndəliyin rəhbəri Roland Kobia QİÇS-i insanlığa təhlükələrdən biri adlandırıb. Hər gün dünyada 7400 adamın bu virusa yoluxduğunu bildirib. O, Aİ-nin Azərbaycanda QİÇS-ə qarşı mübarizədə  reallaşdırılan 7 layihəni maliyyələşdirməsinə diqqət çəkib. Layihə müəllifləri onların fəaliyyət istiqamətləri haqda danışıblar. Bu layihələr QİÇS haqda maarifləndirmədən virusa yoluxmuş adamların hüquqlarının müdafiəsinə, bu kateqoriyadan olan adamların  şəbəkələrinin yaradılmasına kimi istiqamətləri əhatə edir. 

“Lider” Qadınlar Birliyi bu sahədə icra etdikləri layihə çərçivəsində keçirdikləri sorğunun nəticələrini açıqlayıb. Məlum olub ki, respondentlərin 81%-i bu virus haqqında hər hansı informasiya ala bilmir.   

Respondentlərin 78%-i qanköçürmə, 83%-i təsadüfi cinsi əlaqə zamanı QİÇS-ə yoluxma riskinin olduğu cavabını veriblər. Xəstəliyə yoluxanlara münasibət də normal deyil. Belə ki, rəyi soruşulan respondentlərin ancaq 16%-i belə insanlarla ünsiyyət saxlamağa müsbət cavab verib. 65% -i isə belə təmaslardan kənar qalmaq istədiklərini deyiblər. Bu virusa yoluxanların hüquqlarının müdafiəsi, tələb edilən səviyyədə tibbi müalicə ala bilmələrinin vacibliyi, cəmiyyətə inteqrasiya sahəsində problemlərin olduğu xüsusi vurğulanıb. Digər tərəfdən, bu kateqoriyadan olan adamların  şəbəkələşməsi sahəsində də problemlər olması diqqətə çatdıırlıb. QİÇS-ə yoluxmuş valideynlərdən doğulan uşaqların taleyinə də nəzər salınıb. Belə bir statistikanın aparılmadığı söylənilib.

QİÇS-ə qarşı mübarizə ilə yanaşı narkotika istifadəsinə qarşı mübarizə layihəsi də icra edilir. Bu sahədə narkotika aludəçisi olan qadınların durumu diqqət mərkəzində olub. Azərbaycanda 27 min narkotik maddə istifadəçisindən 511-i qadındır. Onlara qarşı ayrı-seçkiliyin olduğu qeyd edilib. Çünki narkomanların kişi hissəsinin bundan xilas olması, reablitasiya olunması ilə bağlı mübarizə getdiyi halda, qadınların bu bəladan qurtarmaları ilə bağlı səylər azdır. 

UNİSEF-in nümayəndəsi Mark Hirvard 2011-ci ili QİÇS-ə yoluxma sahəsində dönüş ili adlandırıb. Onun sözlərinə görə, hazırda dünyada insanların ilbəil QİÇS-ə daha az yoluxması, bu virusdan az insanın ölməsi tendensiyası var. 

Azərbaycan QİÇS-ə Qarşı Mübarizə Mərkəzinin rəhbəri Esmira Alməmmədova Azərbaycanın QİÇS virusunun aşağı səviyyədə yayıldığı ölkələr sırasında olduğunu bildirib. 

Aİ Azərbaycan nümayəndəliyini rəhbəri R.Kobia QİÇS problemini diqqət mərkəzində saxlayaraq bundan sonra da bu virusa qarşı mübarizədə yardımlarını əsirgəməyəcəklərini bildirib.-05C-