Fermerlər ixrac rüsumunun ləğvini istəyirlər

Bakı/08.04.19/Turan: Cəlilabad rayonunun Maşlıq, Kazımabad və Muğan kəndindən olan bir qrup istehsalçı kartofa ixrac rüsumunun tətbiq edilməsinə etiraz olaraq aprelin 8-də Maşlıq kəndində aksiya keçirib.

Aksiya iştirakçıları kartofa ixrac rüsumunun ləğvini tələb edib, istehsalçılar ölkə rəhbərliyinin bu məsələyə diqqət yetirməsi üçün Bakı-Astara magistralını bağlamaq istəyiblər.

"Məqsədimiz ölkə rəhbərliyinin diqqətini problemə cəlb etmək idi. Amma Cəlilabad Rayon İcra Hakimiyyətinin başçısı gəldi, bizi dinlədi, dağılışmağımızın lazım gəldiyini deyərək məsələnin yaxın 2-3 gündə həllini tapacağını söylədi", - aksiya iştirakçılarından biri bildirib.

Fermerlər deyirlər ki, məhsulu ixraca yönəltməmək üçün 1 dollar rüsum tətbiqi məhsulun maya dəyərindən bahadır.

"Hesab edin ki, kartofun yetişdirilməsi 1 manat 20 qəpiyə başa gəlir. İndi biz bunu xaricə çıxara bilmiriksə ölkə içində bu 10-20 qəpiyə satılacaq, əksər məhsul çürüyüb sıradan çıxacaq."

Amma fermerlər məsələnin icra hakimiyyəti başçısının dediyi kimi, 2-3 gündə həll olunacağına inanmırlar.

Digər istehsalçılar da oxşar problem yaşadıqlarını deyiblər: "Yaxın ik-üç gündə topdansatış təşkilatçıları məhsulu bizdən almalı idilər. Amma ixrac rüsumunun tətbiqindən sonra, aprelin 6-da gəlib verdikləri kisələri geri apardılar və səbəb kimi məhsulu xaricə çıxarmağın artıq sərf etmədyini söylədilər."

Son həftələrdə kartof, soğan və kələmin ölkə daxilində pərakəndə satışında kəskin qiymət artmı baş verib. Soğan, kartof və kələmin qiymətində 1 manatdan 2 manatadək bahalaşma qeydə alınıb.

Bunu nəzərə alan Nazirlər Kabineti hər üç məhsulun ixrac rüsumunu mövsümü olaraq artırıb. Belə ki, Nazirlər Kabinetinin qərarına əsasən kartofa tətbiq edilən ixrac gömrük rüsumu bu il aprelin 30-dək 1 kq. üçün 1 dollar (əvvəl 0,8 dollar), soğana və kələmə tətbiq edilən ixrac gömrük rüsumu bu il mayın 30-dək 1 kq. üçün 2 dollar (əvvəl 0,6 dollar) olacaq.