Gəncədə  keçirilən əməliyyatda 33 kiloqramdan çox narkorttik vasitə müsadiə edilib, iki nəfər saxlanılıb

Gəncə Şəhər Baş Polis İdarəsi və tabeli qurumlarının əməkdaşları martın 4-də şəhər ərazisində narkotik vasitələrin qanunsuz dövriyyəsi ilə məşğul olan şəxslərə qarşı əməliyyat keçirib.

Daxili İşlər Nzirliyinin nəlumatına görə, Gəncə şəhərinə gətirilmiş narkotik vasitələri satmaqda və yaymaqda şübhəli bilinən şəxslər saxlanılıb.

Baş İdarənin Narkotik Vasitələrə qarşı Mübarizə Bölməsinin əməkdaşları İrandan gətirilmiş bu vasitələri yerli narkotik vasitə alverçilərinə çatdırmaq istəyən Samux rayon sakini Elşən Xəlilov saxlanılıb.

Şübhəli şəxsin üzərinə baxış keçirilən zaman əlindəki çantadan qara bazarda dəyəri 500.000 manata yaxın olan 14 kq 926 qram çəkidə narkotik vasitə olan heroin aşkar edilərək götürülüb.

Baş İdarənin Cinayət Axtarışı İdarəsinin əməkdaşlarının keçirdikləri əməliyyat-axtarış tədbirləri nəticəsində külli miqdarda narkotik vasitə qanunsuz dövriyyədən çıxarılıb. Belə ki, polis əməkdaşları tərəfindən saxlanılan şəhər sakini Yaşar Abbasovun əlindəki çantadan 18 kq 400 qram çəkidə qurudulmuş marixuana aşkar edilib.

Dindirilmə zamanı şübhəli şəxs narkotik vasitənin ona aid olduğunu, bir müddət əvvəl gizlətdiyi yerdən götürüb Gəncə şəhərinə gətirən zaman saxlanıldığını etiraf edib.

Həmin şəxslərin daxil olduqları narko-şəbəkənin digər üzvlərinin müəyyən edilməsi, həmçinin Gəncə şəhəri ərazisində narkotiklərin qanunsuz dövriyyəsi ilə məşğul olan digər şəxslərin tutulmaları istiqamətində Gəncə Şəhər Baş Polis İdarəsinin əməkdaşları tərəfindən əməliyyatlar davam etdirilir.