Gözəl Bayramlının işi üzrə məhkəmə baxışı dekabrın 13-nə təyin edilib

Bakı/01.12.17/Turan: Dekabrın 1-də Qazax Rayon Məhkəməsində (Bakıdan 460 kilometr qərb) hakim Ağarza Səmədovun sədrliyi ilə AXCP sədrinin müavini Gözəl Bayramlının işi üzrə hazırlıq iclası davam edib. Məhkəmə baxışı dekabrın 13-də saat 14-də təyin edilib. Bu barədə vəkil Elçin Sadıqov Turan-a bildirib.

Bugünki iclasda hakim vəkil Elçin Sadıqovun cinayət işinin icraatına xitam verilməsi, həbsin ev dustaqlığı ilə əvəz edilməsi, 10 ədəd əlavə sübutların tələb edilməsi, qanuna zidd yolla əldə edilmiş sübutların sübutlar siyahısından çıxarılması ilə bağlı vəsatətlərini təmin etməyib

Gözəl Bayramlı məhkəmədə bildirib ki, onun həbsi siyasi fəaliyyəti ilə bağlıdır.

G.Bayramlı bu il mayın 25-də Gürcüstandan qayıdarkən saxlanılıb. Ona qarşı Cinayət Məcəlləsinin 206.1-ci maddəsi (qaçaqmalçılıq) ilə cinayət işi qaldırılıb. G.Bayramlı hüquq müdafiə təşkilatları tərəfindən siyasi məhbus kimi tanınıb.-03B-