Hacıağa Nuri: «Bu, Nardarana qarşı təxribatdır».

“Bu, Nardarana qarşı təxribatdır və tezliklə bunun üstünün açılmasını istəyirik”, - Nardaran ağsaqqalı Hacıağa Nuri dünən səhər saatlarında kəndin küçələrindən birinə “Əli, Hüseyn, Allahu Əkbər” şüarlarının yazılması ilə bağlı bildirib.

“Özü də yarı kiril, yarı latın əlifbası ilə, qaçaraq çəkildə yazılan bir şüardır, mən bunu ancaq təxribat adlandırıram. Nardarandakı güc strukturlarına müraciət etmişik ki, bunun üstü açılsın. Bunu kimsə kənardan edib, kənddə qarşıdurma yaratmaq istəyir”, - H.Nuri baş verənləri dəyərləndirib. O həm də kəndin güc strukturlarının nəzarətində olduğunu bildirərək burada kənar “izin olduğu” qənaətindədir. Onun sözlərinə görə, bu məsələ ilə bağlı 30-a yaxın şəxs saxlanılıb, onlardan 10 nəfərə qədər şəxsə inzibati cəza verilib, qalan şəxslər martın 1-i axşam saatlarında sərbəst buraxılıblar. Kəndin güc strukturlarının nəzarəti altında olduğunu yada salan H.Nuri bu halda belə işin baş verməsini “müəmma” adlandırır.

Kənddə yol tikinti işlərinin getməsi haqda danışan H.Nuri bildirib ki, İmam Hüseyn meydanından “Nardaran Piri”nə gedən 1 km.-lik yolun çəkilişinə başlanılıb.

Qeyd edək ki, 2015-ci il noyabrın 26-da Nardaranda xüsusi əməliyyat keçirilib, bu əməliyyat nəticəsində 2-i polis, 4-ü mülki şəxs olmaqla 6 nəfər ölüb. Aparılan həbslər zamanı “Müsəlman Birliyi” Hərəkatının sədri Tale Bağırov həbs edilib. Daha sonra  bu hərəkatın 68 üzvü cinayət məsliyyətinə cəlb edilib. Onlara qarşı Cinayət Məcəlləsinin terorçuluq, dövlət  çevrilişinə cəhd və s. maddələrilə ittiham irəli sürülüb.      

Digər tərəfdən, dövlət başçısı İlham Əliyev Nardaranda tikinti-abadlıq işlərinin görülməsilə bağlı sərəncam imzalayıb.-05B-