Həbsdə olan AİP sədri haqda bədii əsərin təqdimatı keçirilib

Jurnalist-publisist Cavid Cabbarlı çərşənbə günü Beynəlxalq Mətbuat Mərkəzində “Allaha əmanət” kitabının təqdimatını keçirib. 

Kitab 2013-cü il “Elm və Təhsil” mətbəəsində 1000 nüsxə olmaqla 8 çap vərəqi həcmində çap edilib. 

Kitab İslam Partiyasının həbsdə olan sədri Mövsüm Səmədovun həyatı, fəaliyyəti, həbsi barədə yazılan bədii üslublu əsərdir. Məzmununa görə bədii-publisitika janrı saymaq olar. Amma C.Cabbarlı əsəri roman adlandırıb. 

Bundan əlavə, kitabın ikinci hissəsində Azərbaycan ictimai-siyasi həyatında tanınan şəxslərin M.Səmədovun barəsində fikirləri əksini tapıb. Demokratik Partiyasının sədri Sərdar Cəlaloğlu, AİP-in keçmiş sədri Hacıağa Nuri, DEVAMM sədri İlqar İbrahimoğlu, politoloq Arif Yunus və başqaları AİP sədri haqda fikrilərini bildiriblər. 

Kitabın üz qabığında hicablı qadın, məscid günbəzi, dəmir barmaqlıqlar arxasında AİP sədri, məhbəs əlaməti olan qüllə, ağlayan azyaşlı qız uşağı, kitabın arxasında isə səmaya uzanan pilləkənlər əksini tapıb.

C.Cabbarlı qeyd edib ki, bu fotolarla M.Səmədovun hicabı, məscidi müdafiə etdiyi üçün mühakimə olunduğunu, məhbəsə göndərildiyini, övladı və ailəsindən zorla ayırdıqlarını nəzərə çatdırmaq istəyib. Səmaya qalxan pilləkənlər isə Həqq yolunda məhbus olan M.Səmədova Həqqin mükafatıdır.

C.Cabbarlı kitabın çap edilməsinə səbəb kimi M.Səmədovun məhkəməsi zamanı 3 yaşlı qızının atasından ayrılmaq istəməməsi, əllərini uzadaraq dəmir barmaqlıqlar arxasında atasını qucaqlamaq istəməsi, bu səhnədən hətta hakimin də göz yaşına boğulmasını göstərib. 

Əsasən AİP təmsilçiləri və dindarlardan ibarət olan çıxışçılar əsəri Azərbaycan reallığında həbsdə olan siyasətçi haqda yazılan ilk kitab kimi dəyərləndiriblər. 

AİP sədrinin, eləcə də bütün dindarların həbsini əsassız adlandırıblar, M.Səmədovun həbsinə səbəb kimi zülmə baş əyməməsini göstəriblər. Müəllifə uğurlar arzu edərək bu tipli yeni əsərlər yazmağa səsləyiblər.-05C-