Hüquqşünaslar hesab edirlər ki, pikapların götürülməsi qanunun və konstitusiyanın pozulmasıdır

Bakı/23.09.20/Turan: Sentyabrın 22-dən Azərbaycanda sürücülər yol polisi əməkdaşları tərəfindən pikap tipli avtomaşınların götürülməsi və qapalı avtodayanacaqlara aparılması barədə məlumat verməyə başlayıblar.

Bəzən polislər, sadəcə, avtomobil haqda məlumatları qeyd edirlər və avtomobilin götürülməsinin mümkünlüyü  barədə xəbərdarlıq edirlər. Bəzi sürücülər maşınların Müdafiə Nazirliyinin ehtiyacları üçün götürüldüyünü bildirirlər.

Öz növbəsində DİN Yol Polisi İdarəsi bildirib ki, Nazirlər Kabinetinin 4 aprel 2006-cı il tarixli qərarına əsasən hərbi toplanışlar zamanı hərbi təyinatlı nəqliyyat vasitələrinin texniki vəziyyətinin yoxlanışı aparılır.

“Texniki imkanları yuxarıda qeyd olunan tipə uyğun olan “pikap”  və digər xüsusi xüsusi təyinatlı nəqliyyat vasitələri Nazirlər Kabinetinin 16 fevral 2006-cı il tarixli 51 saylı qərarına əsasən yüksək manevrli avtomobil kateqoriyasına aiddir.Yolsuzluq şəraitində həmin nəqliyyat vasitələrinin istismar sistemlərinə texniki baxış, onların uçot-qeydiyyat göstəricilərini dəqiqləşdirilməsi və onların istifadə ərazisinin (şəhər, qəsəbə, kənd) müəyyən edilməsi məqsədilə həmin avtomobillər stasionar postlarda saxlanılır, onların sahibləri bu barədə məlumatlandırılır”, - məlumatda deyilir.

Milli Məclisin deputatı Erkin Qədirli hesab edir ki, polis düzgün hərəkət etmir. Öncə ölkə prezidenti səfərbərlik elan etməlidir, bu, həm vətəndaşların özünə, həm də onların mülkiyyətinə aid ola bilər. Amma dövlət başçısı bunu etməyib, ona görə də polis qanunu pozur.

Əgər avtomobilləri uçot üçün götürürlərsə, bunu daha asan şəkildə etmək olar: avtomobillər satın alındıqda və ya hədiyyə edildiyində qeydiyyatdan keçirilir. Sahiblərinin adları və ünvanları məlumdur. Onlar hərbi uçota alına bilər (vahid elektron sistemdə), E.Qədirli qeyd edib.

Hüquqşünas Ələsgər  Əhmədoğlu  pikapların götürülməsinə əsas kimi hərbi səfərbərliyin olmaması haqda fikrini bildirib. O, Facebook səhifəsində yazıb ki, dövlət vətəndaşları narahat etməyərək lazımi sayda nəqliyyat vasitəsi almağa qadirdir. 

Vəkil Samirə Ağayeva deyib ki, qanun dövlət ehtiyacları üçün xüsusi mülkiyyətin götürülməsini nəzərdə tutur. Bu halda dövlət alğı-satqı aktı bağlamaqla (Azərbaycan Konstitusiyasının 29.4-cü maddəsi) götürülmüş əmlakın məbləğində kompensasiya ödəməlidir. —0—