Azərbaycan səfirliyi Turan-ın məlumatına reaksiya verib

Bakı/23.09.20/Turan:  Azərbaycanın Rusiyadakı səfirliyi Turan agentliyinin “Azərbaycan hakimiyyəti Dağıstanda həbs edilmiş vətəndaşların taleyinə biganədir?” məqaləsinə cavab verib.

Məqalədə söhbət 15 iyul 2020-ci il tarixində Dağıstanın Qullar qəsəbəsində baş vermiş  etiraz aksiyasından sonra həbs edilmiş 10 Azərbaycan vətəndaşının taleyindən gedirdi.

Səfirliyin məlumatında qeyd olunur ki, sentyabrın 2-3-də Azərbaycan konsulu Toğrul Sadıqov və konsulluğun üçüncü katibi Müsənnif Dadaşov saxlanılan Azərbaycan vətəndaşları ilə görüşmək üçün Dərbəndə ezam olunublar. Onlar İstintaq Təcridxanasında saxlanılan Əziz Fərəczadə, Rövşən Hüseynov, Elmar Musayev, Emin İmaməliyev, Tural Qiyasov, Nahid Ağayev və Elbrus Əhmədovla görüşüblər. 

Sonuncular saxlanma şəraitlərinin qənaətbəxş olduğunu, vəkilləri ilə mütəmadi görüşə bildiklərini və sağlamlıqları ilə bağlı şikayətlərinin olmadığını diqqətə çatdırıblar.

“Səfirliyin əməkdaşları qeyd ediblər ki, məsələni diqqət mərkəzində saxlayırlar. Onların lazımı hüquqi yardımla təmin olunacağı və hazırda bu istiqamətdə müvafiq işlərin davam etdirildiyi barədə həmyerlilərimizə informasiya verilib”, - məlumatda qeyd olunur.

Səfirlik həmyerlilərimizin hüquqlarının qorunması məqsədi ilə Dağıstanda çalışan vəkil R.Rabadanovu cəlb edib.

Görülmüş  tədbirlər Əziz Fərəczadə, Elmar Musayev, Emin İmaməliyev və Elbrus Əhmədov ev dustaqlığına buraxılıb.  Təcridxanada qalan digər üç nəfər: Rövşən Hüseynov, Tural Qiyasov və Nahid Ağayevin işi də səfirliyin və vəkilin diqqət mərkəzindədir. Onların hüquqlarının təmin edilməsi istiqamətində bütün lazımi tədbirlər görülür.

Məlumatda həmçinin deyilir ki, məqalədə adı çəkilən vəkil Murad Vəlixanov iyul ayında səfirliyə müraciət edərək həmyerlilərimizi müdafiə etmək təşəbbüsünü irəli sürüb. Səfirlikdən saxlanılan şəxslərə aid sənədlərlə təmin edilməsini xahiş edib. Səfirlik onun bu  təşəbbüsünü yüksək qiymətləndirib və ona bəzi lazımi sənədləri təqdim edib.

“Fürsətdən istifadə edərək göstərdiyi yanaşmaya görə Murad Vəlixanova bir daha təşəkkürümüzü bildiririk”, - məlumatda deyilir.

Press-relizdə qeyd olunur ki, Moskvanın Troitsk Rayon Məhkəməsində keçirilmiş iclasda 4 nəfər Azərbaycan vətəndaşı məhkəmə zalından buraxılıb və onlardan Moskvanı tərk etməmək haqda yazılı iltizam götürülüb.

“Diqqətinizə çatdırmaq istəyirik ki, səfirlik öz imkanları və səlahiyyətləri çərçivəsində vətəndaşlarımızın hüquqlarının qorunması üçün bütün mümkün addımları atır. Hər görülmüş iş, atılmış addım barəsində də KİV-ə məlumatın verilməsini məqsədəuyğun hesab etmir”, - məlumatda deyilir.

Eyni zamanda səfirlik bu kimi həssas, insan taleyinə aid mövzulara toxunarkən ictimaiyyətə həqiqəti əks etdirən dolğun məlumat vermək üçün  KİV ilə əməkdaşlığa hazır olduğunu bildirir.—06D-