İbad Hüseynovun tərəfdarları təkzib edirlər, amma əsas sualları cavablandırmırlar

831 və 161-ci batalyonların bir qrup döyüşçüsü general Talıb Məmmədovun bu yaxınlarda yaydığı İbad Hüseynovun məşhur erməni terrorçusu Monte Melkonyanın aradan qaldırılmasında iştirakı olmadığı haqda bəyanatını təkzib edən müraciətlə çıxış edib.

“General -  leytenant Talıb Məmmədovun “Turan” informasiya agentliyinə vermiş olduğu müsahibə təəssüf hissi doğurmaya bilmir çün ki, biz general Talıb Məmmədovu Qarabağ savaşında müəyyən döyüş yolu keçmiş bir zabit kimi tanıyırıq və məhz onun tərəfindən bu fikrin söylənilməsini heç bir vəchlə qəbul edə bilmirik”, deyə bəyanatda bildirilir.

Döyüşçülər iddia edirlər ki, ermənilər Melkonyanın ölümünə qəhrəmanlıq xarakteri vermək üçün onun Mərzilidə həlak olması haqqında versiya uydurublar.

Daha sonra bəyanatda iddia olunur ki, Xocavəndin 831-ci özünümüdafiə batalyonu Mərzili kəndindən Ağburuna qədər olan ərazidə döyüş əməliyyatları aparan yeganə bölmə idi və İbad Hüseynov bu bölmənin üzvü idi. 

Daha sonra döyüşçülər “həmin vaxtın arxiv sənədlərinin real vəziyyəti əks etdirmədiyi haqqında” bir qədər qəribə səslənən etiraf edirlər. (bəyanat müəllifləri məhz nəyi nəzərdə tutduqlarını açıqlamırlar, amma görünür, bu, 708-ci briqadanın həmin dövrdə - 1993-cü ilin iyununda İbad Hüseynovun xidmət etdiyi 161-ci batalyonun hələ yaradılmadığı haqqında ittihamlarına cavabdır).

Bəyanat müəlliflərinin sözlərinə görə, 831-ci batalyon 1993-cü ilin avqustunda 161-ci batalyon adlandırılıb. Daha sonra iddia olunur ki, İbad Hüseynov 1993-cü ilin iyununda Monte Melkonyanın məhv edilməsi üzrə əməliyyat həyata keçirib. “1993-cü ilin iyun ayının 10-da İbad Hüseynovun başçılıq etdiyi kəşfiyyat bölüyü düşmən arxasına keçib və iyun ayının 12-də Monte Melkonyan qətlə yetirildikdən sonra iyun ayının 13-də çox böyük çətinliklər hesabına geri qayıda biliblər. Həmin əməliyyat zamanı ermənilərdən əldə olunmuş qənimət korpus komandirinin masasının üzərinə qoyulub”.

Daha sonra bəyanat müəllifləri maraqlı etiraf edir: “1994-cü ildə İbad Hüseynova Azərbaycan Respublikasının Milli qəhrəmanı adının verilməsi barədə  iki dəfə təqdimat yazılıb və təqdimatların heç birində Monte Melkonyanın məhv edilməsi və ya onun tərəfindən öldürülməsi qeyd edilməyib”.

Bəyanat müəllifləri bu qəribə halı düz-əməlli izah edə bilmirlər, İbad Hüseynovun “Melkonyanın məhv edilməsindən daha ciddi əməliyyatlar həyata keçirib”. Bu əməliyyatların nədən ibarət olduğu açıqlanmır. Onun Azərbaycan Bayrağı ordeni ilə təltif olunmasına gəlincə, bu da Melkonyanın məhvinə görə deyil, deyə bəyanatda vurğulanır.

Müəlliflər həmçinin kimlərinsə İbad Hüseynov mövzusunu siyasiləşdirmək istəməsindən və ona qarşı “ədalətsizlik” edilməsindən narazılıqlarını bildirirlər. Sonda bəyanat müəllifləri obyektivliyə çağırırlar.

Bu müraciətin Turan agentliyinə daxil olan elektron versiyasında 25 ad göstərilib.

Redaksiyadan: Qeyd edək ki, İbad Hüseynovun tərəfdarları hələ də əsas ittihamlara cavab verməyiblər: Melkonyanın Muğanlı kəndində öldürülməsinin sübutları haradadır? İbad Hüseynov özü fotoşəkildə kimin başını nümayiş etdirir və niyə o, Melkonyana bənzəmir? Bu Melkonyanın başıdırsa, iyunun 19-da Yerevanda kimi dəfn ediblər?

Bu suallara cavab verilməsi yerinə, bəyanatda mübahisə etməmək çağırışları səslənir. Eyni zamanda, döyüşçülər özləri də bilmədən çox ciddi sual qaldırıblar: İbad Hüseynov Melkonyanın aradan qaldırılması üzrə xüsusi əməliyyat həyata keçiribsə, niyə 1994-cü ildə qəhrəman adı almaq üçün verilmiş iki təqdimatda bu barədə heç nə deyilməyib? Bəlkə də deyilib, amma Müdafiə Nazirliyi real vəziyyətdən xəbərdar olduğu üçün İbad Hüseynovun ordenlə təltif edilməsi ilə kifayətlənib? -02В-