İki əsgər intihara cəhd edib

Yanvarın 12-də Gəncə şəhərindəki hərbi hissəsələrdən birində 2014-cü ilin yanvarında Səfərbərlik və Hərbi Xidmətə Çağırış üzrə Dövlət Xidmətinin Lənkəran şöbəsindən müddətli həqiqi hərbi xidmətə çağırılan əsgər Rəvan Əlizadə və 2014-cü ilin yanvarında Bakının Nizami rayonundan müddətli həqiqi hərbi xidmətə çağırılan əsgər Nicat Nəcəfov özlərinə müxtəlif dərəcəli bədən xəsarətləri yetirib (sol saidin kəsilmiş yaraları diaqnozu). Hər iki əsgərə tibb məntəqəsində ilkin yardım göstərilib. Bu barədə Müdafiə Nazirliyinin mətbuat xidməti məlumat yayıb. 

Xəbərdə deyilir ki, yanvarın 13-də əsgərlər Bakı şəhərinə gətirilərək Silahlı Qüvvələrin Baş Kliniki Hospitalının Psixiatriya bölməsinə yerləşdiriliblər. Əsgərlərin vəziyyəti kafidir. 

Müalicə bitdikdən sonra xəstəlik epikrizi çıxarılacaq. Respublika baş psixiatrının rəyi alındıqdan sonra, hər iki əsgərin Silahlı Qüvvələrin sıralarında xidmətlərini davam etdirməsi məsələsi həll ediləcək. 

Hadisə ilə bağlı cinayət işi başlanıb. Faktla əlaqədar Hərbi Prokurorluq tərəfindən araşdırma aparılır.

Mətbuat xidməti bildirir ki, baş verən hadisələrin ilkin araşdırması göstərir ki, əksər hallarda bu cür hərəkətləri adaptasiya dövründə, mənəvi-psixoloji və fiziki cəhətdən hərbi xidmətə tam hazır olmayan, hərbi xidmətin çətinliklərinə dözməyən gənclər törədir.

Müdafiə Nazirliyi valideynlərə, təhsil müəssisələrinin pedaqoji kollektivlərinə, ictimaiyyət nümayəndələrinə müraciət edərək, həqiqi hərbi xidmətə çağırılan gənclərin vətənə məhəbbət, xalqa, dövlətə sədaqət ruhunda tərbiyə olunması, onlarda fədakarlıq və qəhrəmanlıq hisslərinin aşılanması, mənəvi-psixoloji cəhətdən hərbi xidmətin çətinliklərinə hazır olmalarına diqqət yetirilməsini xahiş edir. -03D-