İsmayıllıda jurnalistə qarşı iddia üzrə hazırlıq iclası olub

Martın 12-də İsmayıllı Rayon Məhkəməsində hakim Azad Əliyevin sədrliyi ilə “Azərbaycan saatı” televiziya proqramının İsmayıllı rayonundakı əməkdaşı Elçin İsmayıllıya qarşı şərəf və ləyaqətin təhqiri ittihamı üzrə hazırlıq iclası keçirlib. İş üzrə məhkəmə prosesi aprelin 9-na təyin edilib.

“Azərbaycan saatı” televiziya proqramı iqtidarı tənqidi verilişləri ilə tanınır. Proqramın əməkdaşı Seymur Həzi bundan öncə xuliqanlıq ittihamı ilə həbs edilib. Prodüser Xalid Qarayev inzibati qaydada 25 gün həbsdə olub. Digər əməkdaşlar Qənimət Zahid və Natiq Ədilov ölkəni tərk ediblər.

E. İsmayıllını Çernobıl Əlilləri İctimai Birliyinin İsmayıllı şöbəsinin sədri Məleykə Lətifova məhkəməyə verib. O, şərəf və ləyaqətinin təhqiri ittihamı ilə maddi təzminat tələb edir.

E.İsmayıllı Turan-a bildirib ki, bugünkü hazılıq iclasında rayonda məktəbli forması tikən fabrikin direktoru Lətafət Məmmədovanın da jurnalisti məhkəməyə verdiyi məlum olub. O da təhqir müqabilində maddi və mənəvi təzminat tələb edir.  

İddiaçılar jurnalistin sosial şəbəkələrdə İsmayıllı camaatını təhqir etdiyini və “Azadlıq” qəzetində təkzib verməsini tələb edirlər.

“Halbuki, mən sosial şəbəkələrdə İsmayıllı camaatı ilə bağlı status yazmamışam, “Azadlıq” qəzetində isə ümumiyyətlə İsmayıllı ilə bağlı məqalə çap etdirməmişəm. Şikayətlər sifarişdir və jurnalist fəaliyyətimin məhdudlaşdırılmasına yönəlib. Şikayət son zamanlar “Azərbaycan saatı” proqramında İsmayıllı sakinlərinin şikayəti əsasında hazırladığım videosüjetlərdən sonra edilib”, - E. İsmayıllı Turan-a bildirib. –0--