İtkin düşən iki hərbçinin şəxsiyyəti müəyyən edilib

Bakı/22.05.21/Turan: İtkin düşən daha iki hərbi qulluqçunun şəxsiyyəti müəyyənləşdirilib.

Hərbi Prokurorluğun məlumatına görə, itkin düşən hərbi qulluqçular – baş leytenant Qənbər Qənbərli və müddətdən artıq həqiqi hərbi xidmət hərbi qulluqçusu, əsgər Pırviz Nağıyevin şəxsiyyətləri müəyyənləşdirilərək meyitlərinin aidiyyəti üzrə verilməsi təmin olunub.

Xatırladaq ki, 44 günldavam edən Vətən müharibəsi zamanı itkin düşən 20-yə qədər hərbçi axtarılır. Bir neçə gün öncə daha iki hərbçinin nəşinin aidiyyatı üzrə təhvil verilməsi barədə rəsmi məlumat yayılıb.

Beynəlxalq Qızıl Xaç Komitəsinin məlumatına görə, Dağlıq Qarabaq münaqişəsi başlayandan sonra, 2020-ci il sentyabrın 27-dək hər iki tərəfin ümumi itkiləri 30,000 insan olub. 4,500 insan isə itkin sayılır.

Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatına görə, 2020-ci il 27 sentyabradək itkin düşən 4500 nəfər insandan 3890 nəfəri Azərbaycan vətəndaşlarıdır. -0-