Aİ Azərbaycanda sanitar və fitosanitar tədbirlərə yardım edir

Bakı/22.05.21/Turan:  Avropa İttifaqının (Aİ) dəstəyi ilə keçirilən “Azərbaycanda sanitar və fitosanitar tədbirlərin gücləndirilməsi” adlı tvinninq layihəsi çərçivəsində videokonfrans formatında  komitə iclası keçirilib. Bu barədə xəbəri Azərbaycan Respublikası Qida Təhlükəsizliyi Agentliyinin (AQTA) yayıb.

Görüşdə rezident Tvinninq Müşaviri Gintaras Lapinskas layihənin ikinci rübündə həyata keçirilən Azərbaycanda qida təhlükəsizliyi və fitosanitar nəzarət sahələrində bir sıra qanunvericilik layihəsinin hazırlandığı və ya nəzərdən keçirildiyi, mövcud İT məlumat toplama sisteminin təhlili və tövsiyyələrin verildiyi haqqında məlumat verib. Gintaras Lapinskas  görüləcək işlər sırasında müvafiq qanunvericilik layihələrinin hazırlanması və ya nəzərdən keçirilməsi istiqamətində işlərin davam etdirilməsi, laboratoriya mütəxəssislərinin və müfəttişlərinin təlimlərə cəlb edilməsini deyib.

Qeyd edək ki, tvininq layihəsinin keçirilməsində məqsəd Azərbaycanda qida və yemlərin təhlükəsizliyinin artırılmasına töhfə vermək və təkmilləşdirilmiş sanitar və fitosanitar standartlara uyğun ixrac imkanlarını genişləndirməkdir. Layihə çərçivəsində milli qida qanunvericiliyinin Avropa İttifaqi qanunvericiliyinə daha da uyğunlaşdırılması, bitki mühafizə vasitələrinə nəzarət mexanizmlərinin daha da təkmilləşdirilməsi, həmçinin İT əsaslı fitosanitar informasiya sisteminin hazırlanması nəzərdə tutulub.—0--