Jurnalist Elçin Həsənzadə həbs oluna bilər

Hüquq müdafiəçisi və jurnalist Elçin Həsənzadə (Həsənov) həbs təhlükəsi ilə üzləşib. O, iki aydan çoxdur məhkəmənin aylıq əmək haqqının 20%-i tutulmaqla islah işlərinə cəlb edilməsi haqqında hökmünü yerinə yetirə bilmir. Buna səbəb iş olmamasıdır.

Xatırladaq ki, iyunun 1-də Bakının Nizami rayon məhkəməsi Həsənzadəni 1 il islah işlərinə cəlb edib. Cinayət işi 2015-ci ilin fevralında baş vermiş hadisə ilə bağlı idi. Həmin vaxt jurnalist “Asiya” agentliyinin keçmiş rəhbəri Cəfər Cəfərovun hücumuna məruz qalmışdı.

Məhkəmənin qərarı ilə, Həsənzadə işə götürənlə elektron müqavilə bağlamalı, vergi ödəyicisinin identifikasiya nömrəsini və vergi ödənişi haqqında arayışı təqdim etməli idi. Amma o, iki aydır bu şərtlərə uyğun iş tapa bilmir, belə ki, bir çox kommersiya qurumları işçilərin qəbulunu rəsmi olaraq sənədləşdirmək istəmir.

“Digər tərəfdən, siyasi fəaliyyətlə məşğul olan bir insanı kim işə götürər?”, deyə Həsənzadə qeyd edib.

Bu gün o, məhkəmə icraçısından bildiriş alıb ki, hökmün çıxarıldığı andan etibarən üç ay sonra Həsənzadə işə düzəldiyi və əmək haqqının 20%-nin tutulduğu haqqında arayış təqdim etməsə, jurnalist həbs ediləcək.

Həsənzadə Sumqayıt şəhərinin Məşğulluq Mərkəzində uçota durub. Bu gün o, bu mərkəzdən 125 manat maaşla küçə süpürgəçisi işləmək təklifi alıb. Bu məbləğin 25 manatını hökmün icrası üçün ödəyəcək. “Bu, çox kiçik məbləğdir, onunla dolanmaq mümkün deyil. İkincisi, bu, məni təhqir etmək üçün qəsdən edilir”, deyə Həsənzadə bildirib.

Məşğulluq Mərkəzindən məhkəmə icrası şöbəsinə Həsənzadənin işdən imtina etdiyi haqqında məktub göndərilib. Bir neçə gün sonra o, 4 aydan 1 ilə qədər həbs oluna bilər.

Jurnalist ictimaiyyətdən rəsmi sənədləşmə və vergi ödənişi ilə işə düzəlməsində köməklik göstərilməsini xahiş edir.

Həsənzadənin işlədiyi “Yüksəliş naminə” qəzeti bir neçə ildir fəaliyyət göstərmir. Saytın isə gəliri yoxdur. Həsənov həmçinin Azərbaycan Xalq Cəbhəsi Partiyasının Ali Məclisinin üzvüdür. -06B-