Jurnalistin qətlində təqsirləndirilənlər Cavid Hüseynovu təmizə çıxarmağa çalışırlar

Yanvarın 12-də Bakı Ağır Cinayətlər Məhkəməsində jurnalist Rasim Əliyevin qətli haqqında iş üzrə prosesdə ittiham aktı oxunub.

Müttəhimlərdən ikisi – Kənan Mədətov və Samir Mustafayev özlərini təqsirli bilməyiblər, Elşən İsmayılov, Arif Əliyev və Camal Məmmədov isə özlərini qismən təqsirli biliblər.

Bu barədə jurnalistlərə zərərçəkmiş tərəfin vəkili Əsabəli Mustafayev bildirib. Onun sözlərinə görə, təqsirləndirilən şəxslər istintaqdakı ifadələrinə zidd ifadələr veriblər.

Təqsirləndirilən Elşən İsmayılov iddia edib ki, qohumu, futbolçu Cavid Hüseynovun jurnalistlə “hesablaşmadan” xəbəri olmayıb.

İsmayılov jurnalistlə görüşə gedərkən yanında bir neçə nəfər aparmasını tanımadığı insanla görüşə getməsi ilə izah edib. Növbəti iclas noyabrın 14-nə təyin edilib.

Vəkil bildirib ki, məhkəmənin gedişatı zamanı müdafiə tərəfi yenidən həkimlərin məsuliyyətə cəlb edilməsi məsələsini qaldıracaq.

“İş materiallarında yazılıb ki, Rasim Əliyev ona göstərilən tibbi yardıma baxmayaraq dünyasını dəyişib. Biz hesab edirik ki, ona heç bir yardım göstərilməyib”, deyə Mustafayev bildirib.

Reportyorların Azadlıq və Təhlükəsizlik İnstitutunun üzvü, ann.az agentliyinin müxbiri Rasim Əliyev 2014-cü il avqustun 8-də bir qrup şəxs tərəfindən döyülüb, bundan sonra şəhər kliniki mərkəzində dünyasını dəyişib. Hadisəyə Əliyevin “Qəbələ” FK futbolçusu Cavid Hüseynov haqqında tənqidi statusu səbəb olub. Jurnalistin ölüm faktı üzrə cinayət işi ilə əlaqədar Hüseynov da daxil olmaqla, altı nəfər məsuliyyətə cəlb edilib. Hüseynov hazırlanan və baş vermiş cinayət haqqında məlumat verməməkdə ittiham olunur. Lakin istintaq başa çatarkən onun barəsində iş ayrıca icraata götürülüb. -03C06-