Körpələr peyvəndə çağırılır

Bakı/23.04.18/Turan: Aprelin 23-29-da Avropa İmmunizasiya Həftəsi çərçivəsində Azərbaycanda uşaqların peyvənd olunması üzrə kampaniya keçiriləcək. Bu illik beynəlxalq tədbir Ümumdünya Səhiyyə Təşkilatının (ÜST) himayəsi altında keçirilir.

Bu, insanların sağlamlığı məqsədilə immunizasiyanın əhəmiyyəti haqqında bilginin artırılmasına, valideynlər, səhiyyə sistemi işçiləri, uşaq hüquqlarının müdafiəsi sahəsində siyasətin formalaşdırılmasına məsul olan şəxslər və KİV-in bu tədbirin əhəmiyyəti haqda məlumatlandırılması yolu ilə vaksinasiyanın əhatəsinin genişləndirilməsinə yönəlib.

Ölkəmiz 2007-ci ildə Avropa İmmunizasiya Həftəsinə (AİH) qoşulub. Səhiyyə Nazirliyinin müvafiq departamentindən Turan-a bildirilib ki, AİH çərçivəsində nəzərdə tutulan tədbirlərin həyata keçirilməsi üçün hazırlıq işləri görülüb, vaksinlər alınıb. Bütün yerli poliklinikalarda hər hansı səbəbdən tam peyvənd kursunu almayan və ya ümumiyyətlə peyvənd edilməyən uşaqlara peyvənd vurulacaq. Bu profilaktika əsas yoluxucu xəstəliklər: vərəm, hepatit B, poliomielit, göyöskürək, difteriya, tetanus, qızılca, parotit, hemofiliya infeksiyası, həmçinin pnevmoniyaya qarşı peyvəndləri nəzərdə tutur.

Peyvənd bir yaşınadək uşaqlara edilir - 7 və 9-cu ayında.

Son illər valideynlərin çoxunda peyvəndlə bağlı mənfi fikir formalaşıb. Odur ki, uşaq poliklinikalarındakı sahə həkimləri və tibb bacıları valideynlərə telefon edərək uşaqların peyvəndə gətirilməsini təkidlə xahiş etməlidir. Bəziləri poliklinikaya gəlir, ancaq bu prosedurdan imtina etdiyini yazılı olaraq bildirmək üçün. Çox zaman onlar peyvəndə görə özəl klinikalara üz tuturlar. Onların vaksinlərin effektivliyi ilə bağlı şübhə və narahatlıqları əsassız deyil. Sosial şəbəkələrdə və KİV-də vaksinin mənfi nəticələrinə dair onlarla fakt göstərilir. Məsələn, "Exo" qəzeti paytaxt sakini Olqa Ələkbərova haqda yazıb. Onun qızı üç ayında ikən poliklinikadan telefon edərək planlı AKDS peyvəndinin (difteriya, tetanus, göyöskürəyə qarşı) vurulmasına çağırıblar.

"Poliklinikada Hindistan istehsalı olan peyvənd vuruldu. Həkim uşağın allergiyalı olub-olmaması ilə maraqlanmadı. Evdə körpəni yatırdım. Ancaq iki saatdan sonra oyanmadı. Mən nəyinsə qaydasında olmadığından şübhələndim və uşağı oyandırmağa çalışdım. Ancaq qızım oyanmırdı. Təcili yardıma və tibb təhsili olan qohumuma telefon etdim. O dedi ki, mən cəld uşağı başı aşağı tutub dabanından vurum. Belə etdikdən sonra qızım gözlərini açdı və rəngi çəhrayı oldu. Sonra təcili yardım gəldi. Həkimlər dedilər ki, uşaq vaksindən qıcolma keçirib.

Poliklinikalarda istifadə olunan Hindistan istehsallı vaksinlər əks təsir verir. Odur ki, ən yaxşısı Belçika və ya Fransa vaksinlərindən istifadə etmək lazımdır", - qəzet yazır.

Jam-news.net saytı Bakı sakini Əhməd Rəhmanov haqda yazır. Yeddi il öncə onun oğlu peyvənddən sonra autist olub. O, çox çətinliklə müəyyənləşdirib ki, preparatda (ya Rusiya, ya da Hindistan istehsalı olub) civə və alüminiumun normadan çox olması uşaqda autizmin inkişafına səbəb olub. Ə.Rəhmanov tətbiq edilən vaksinlərin tərkibində zərərli maddələrin olmasını sübut etmək üçün Səhiyyə Nazirliyini məhkəməyə verib, ancaq işi uduzub.

Sabunçu rayonundakı uşaq poliklinikalarının birinin əməkdaşı Turan-ın müxbiri ilə şəxsi söhbətində deyib ki, dövlət tibb müəssisələrinə Hindistan və ya Belçika istehsalı olan vaksinlər verilir. Bu preparatların yararlılıq müddəti bitdikdən sonra geri qaytarırlar. Peyvəndə görə poliklinikalara elə çox gələn olmur. Özəl klinikalar yüksək qoruyucu təsiri və fəsad törətməyən Belçika vaksinlərini alırlar. Fəsadlar vaksinasiya texnikasının pozulması, uşaq orqanizminin xüsusiyyəti, dərmanın keyfiyyətinin pis olması, onun saxlanma şəraitinin pozulması ilə əlaqədar baş verə bilər.

Elmi-Tədqiqat Pediatriya İnstitutunun direktoru, ölkənin baş pediatrı Nəsib Quliyev valideynlərə məsləhət görür ki, uşaqları yoluxucu xəstəliklərdən qorumaq üçün onlara peyvənd vurdursunlar.

"Ancaq həkim kimisə buna məcbur edə bilməz. Belə olan halda qanuna əsasən poliklinikanın həkimi və ya valideynlər vaksinasiyadan imtina ərizəsini imzalayırlar. Azərbaycanın xarici istehsalçılardan aldığı vaksinlərin keyfiyyəti kifayət qədər yüksəkdir. Demək olar ki, hər vaksin üzrə ÜST-nin tələbləri var. Əsas tələblərdən biri təhlükəsizlikdir. Bütün bu məsələlər Səhiyyə Nazirliyinin mütəxəssisləri tərəfindən yoxlanılır", - N.Quliyev qeyd edib. -0-