Korrupsiyaya qarşı mübarizə üzrə Milli Plan üçdə bir hissə yerinə yetirilib

Korrupsiyaya qarşı mübarizəyə dair 2012-2015-ci illər üçün Milli Fəaliyyət Planında nəzərdə tutulan tədbirlər üçdə bir hissə yerinə yetirilib. USAİD-in maliyyə dəstəyilə “Konstitusiya” Fondunun keçirdiyi monitorinqin nəticələri bundan xəbər verir.

“Konstitusiya” Fondunun rəhbəri Əliməmməd Nuriyev təqdimat mərasimində bildirib ki, monitorinq 2012-ci ildən 2013-cü ilədək olan dövrü əhatə edir. Onun sözlərinə görə, həmin dövr üçün nəzərdə tutulan tədbirlər 34% yerinə yetirilib. Layihə icraçılarının üzləşdikləri problemlərdən biri dövlət orqanlarının Fondun sorğularına cavab verməməsidir.    

Bununla yanaşı bəzi dövlət orqanları araşdırmalar başa çatdıqdan sonra şəffaflıq sahəsində müsbət addımlar atıblar. Belə ki, rəhbərliyin dəyişildiyi Əmək və Əhalinin Müdafiəsi Nazirliyi bu günlərdə öz saytında ünvanlı sosial yardım alan bütün şəxslər haqqında informasiya yerləşdirib.    

Ə.Nuriyev bildirib ki, monitorinq göstərib ki, bir neçə deyil, bir dövlət orqanının məsuliyyət daşıdığı yerlərdə tədbirlər daha yaxşı həyata keçirilib.

“Şəffaflıq Azərbaycan” təşkilatının rəhbəri Rəna Səfərəliyeva bildirib ki, araşdırma zamanı Transparensy International ekspertlərinin metodikası tətbiq olunub.

“Konstitusiya” Fondunun eksperti Zaur İbrahimli qeyd edib ki, monitorinq zamanı açıq mənbələrdən – dövlət orqanlarının saytlarından məlumatlar, onların layihə icraçılarının sorğularına cavabları, KİV materialları və tərəfdaş QHT-nin sorğularına cavablar əsas kimi götürülüb. 

Müzakirələr zamanı bildirilib ki, nəzərdə tutulan tədbirlərin reallaşmasında geriləmə ümumilikdə Fəaliyyət Planının icrasına mənfi təsir göstərib. 

Bundan əlavə, milli donorlara tövsiyə olunub ki, korrupsiyaya qarşı mübarizə sahəsində tədbirlərə ictimai nəzarət üçün QHT-lərə maliyyə buraxılışı artırılsın.

Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı 28 maddədən ibarətdir. Planda mühüm yer qanunverici bazanın təkmilləşdirilməsinə ayrılır. 

Bundan əlavə, korrupsiyaya qarşı mübarizədə hüquq-mühafizə orqanları ilə əməkdaşlıq edən şəxs və şahidlərin təkmilləşdirilməsi üzrə əlavə tədbirlərin qəbulu nəzərdə tutulur.

Bəzi tədbirlər dövlət xidmətinə aiddir. Əsasən dövlət xidmətinə qəbul zamanı və ümumilikdə onun fəaliyyəti zamanı şəffaflığın artırılması üzrə kompleks tədbirlər nəzərdə tutulub. Plana əsasən bir çox dövlət xidmətləri elektron formaya keçəcək. Belə ki, dövlət əmlak reyestrindən çıxarışlar elektron formada veriləcək. Müxtəlif sahibkarlıq növləri üçün lisenziyaların verilməsinin elektron formaya keçirilməsi nəzərdə tutulur.  

Həmçinin plan dövlət orqanları ilə vətəndaş cəmiyyəti institutlarının əməkdaşlığını nəzərdə tutur. Lakin sözügedən tədbirlərin bir çoxu hələlik yerinə yetirilməyib.—06D--