«Məcburi köçkünlər işıq istəyirdi, iğtişaş yox»

“Biləsuvarda məskunlaşan Cəbrayıl rayonundan olan məcburi köçkünlərin yaşadıqları qəsəbələrdə iğtişaş yox, elektrikin verilməməsinə etiraz olub”, - dekabrın 22-də sakinlərin keçirdiyi etraz aksiyasından sonra barəsində 3 aylıq həbs qətimkan tədbiri seçilən Ülvi Quliyevin atası Məhəmməd Quliyev Turan agentliyinə bildirib.

M.Quliyevin fikrincə, elektrik enerjisinin tez-tez kəsliməsi narazılığa səbəb olub.  

“Qəsəbə sakinlərini 7-ci qəsəbədəki zala topladılar ki, daha elektrik kəsilməyəcək. Amma toplantının başlanmasına az qalmış işıqlar yenidən kəsildi, bu isə etirazları daha da gücləndirdi”, - o qeyd edib.

 Onun sözlərinə görə, sakinlər zaldan çıxdıqdan sonra  avtomobili camaatın üzərinə sürüblər, həmin avtomobil də buna görə insanlar tərəfindən daş-qalaq edilib.

“Həmin avtomobil xidməti deyil, hadisələr iğtişaş olsaydı polis maşınlarına da ziyan dəyərdi, amma xalq bu avtomobillərə toxunmayıb”.

Onun fikrincə, etirazın genişlənməsində polis əməkdaşlarının davranışı da az rol oynamayıb.

“Polisin insanlarla qaba davranışı, nalayiq ifadələri hadisələri bir az da qızışdırdı”, - o bildirib.

M.Quliyev ətraf rayonlardan polis qüvvələri çağırılmasını əsassız hesab edir. Onun fikrincə, bunda məqsəd, sadəcə, kimlərinsə hadisənin miqyasını süni surətdə qabartmaq və həbslərə haqq qazandırmaq olub. 

O, Rayon İcra Hakimiyyətinin daşa basılmasından da danışıb: “Bu, bir məamma idi. Başqa vaxt İcra Hakimiyyətinin həndəvərində bir daş belə tapa bilmirsən, amma hadisələr zamanı orada bir yük maşınının həcmi qədər yumru daşlar vardı, elə bil kimsə qəsdən insanlara qarşı qızışdırıcılıq edirdi”.

M.Quliyevə görə, insanların etiraz etməkdə  məqsədi yalnız elektrik enerjisinin verilməsinin bərpa edilməsi olub.

O, deputat Astan Şahverdiyevin aksiyada iştirak edənləri “içkili, nəşəxor” adlandırmasını da qınayıb və deputatı yalan danışmaqda suçlayıb: “Əvvəla, aksiyada heç kəs içkili və ya nəşəli olmayıb, ikincisi bir anlıq təsəvvür edək ki, A.Sahverdiyev düz deyir, onda sual yaranır ki, Cəbrayıl rayonunun polis rəisi olan Astan Sahverdiyevin qardaşı oğlu hara baxır?”

M.Quliyev sakinlərin etirazları barədə deputatın dediklərini əsassız sayaraq həbs edilənlərə qarşı irəli sürülən ittihamları uydurma adlandırıb.  

Xatırladaq ki, dekabrın 22-də Biləsuvarda məskunlaşan Cəbrayıldan olan məcburi köçkünlər yaşadıqları qəsəbələrə verilən elektrik enerjisinin kəsilməsinə görə etiraz aksiyası keçirib. 

Aksiyadan sonra dekabrın 23-də Cəlal Quliyev, Zaur Feyruzlu, Gülağa Alməmmədov saxlanılıb və onların barəsində hakimiyyət nümayəndəsinə müqavimət göstərmək, iğtişaşlar törətmək, başqasının əmlakına qəsdən ziyan vurmaq maddəsilə ittiham irəli sürülüb.

Dekabrın 24-də isə qəsəbə sakinləri Ülvi Quliyev və İlkin İsgəndərov eyni ittihamla həbs edilib.