Media-icmal 03.03.21

COVİD-19 pandemiyası ilə bağlı karantin rejiminin sərtləşdirilə bilməsi mümkünlüyü, Ermənistanın Qarabağda müharibə törədə bilməsi ehtimalı,  Operativ Qərargahın fəaliyyətinə baxış, bahalaşma ola bilməsi iddiaları və s. medianın aparıcı mövzuları sırasındadır...

“Müsavat.com” saytı “Karantin rejimini sərtləşdirmək lazım deyil - qapanma ilə bağlı açıqlama” sərlövhəli məqalədə COVİD-19 pandemiyası ilə bağlı karantin rejiminin bundan sonra sərtləşdirilib-sərtləşdirilməməsi məsələsini tibb professoru Adil Qeybulla ilə dəyərləndirir.

A.Qeybulla hesab edir ki, əgər yoluxma sayı cüzi qalxırsa, buna görə karantin rejimini sərtləşdirmək lazım deyil. “...Əgər yoluxma pik həddə çatarsa, o zaman sərt karantin rejimi mütləqdir, hazırkı situasiyada buna gərək duymuram”, deyə professor bildirib.

Onun fikrincə, hazırki şəraitə görə karantin rejiminin sərtləşdirilməsi uyğun deyil.

A.Qeybulla əlavə edir ki, indi Avropada koronavirusun Britaniya ştammı geniş şəkildə yayılır, Azərbaycanda isə hələ bu ştammın yayılması müşahidə edilmir. Əgər yayılarsa, mövcud vəziyyət təhlil edilib, qərar qəbul oluna bilər.

Onun sözlərinə görə, iyun ayına qədər pandemiyadan yaxa qurtarmaq olar.

“Hesab edirəm ki, iyun ayında biz pandemiyanı tam nəzarət altına ala biləcəyik.

ÜST də bu yöndə müsbət açıqlamalar verir. Ona görə də, düşünmürəm ki, bu ili də ötən il olduğu kimi sərt karantin rejimində, qapalı vəziyyətdə keçirək”.

“Yenisabah.az” saytında “Qarabağda təxribatlar ola bilər, müharibə isə… - sabiq nazir” sərlövhəli məqalədə Ermənistan iqtidarının hakimiyyəti qorumaq üçün müharibəyə əl ata bilməsi ehtimalı keçmiş xarici işlər naziri Tofiq Zülfüqarovla müzakirə edilir.

Müəllif deyir ki, Ermənistan ordu rəhbərliyi baş nazirin istefasını tələb etməklə ölkə daxilində vəziyyəti gərginləşdirib. Bundan irəli gələrək, müəllif Nikol Paşinyanın hakimiyyətini qorumaq üçün yeni müharibəyə başlaya bilməsi sualını gündəmə gətirir.

Keçmiş nazir isə deyir ki, Ermənistan daxilində gərginlik çox yüksəkdir, amma N.Paşinyan heç bir müharibə anonsu verə bilməz. T.Zülfüqarova görə, səbəb də budur ki, 44 günlük İkinci Qarabağ savaşı ilə Ermənistanın hərbi potensialı sıradan çıxıb, iqtisadiyyat isə bərbad haldadır: “Ona görə də Paşinyan müharibəyə cəhd edə bilməz”.

Eks-nazir Ermənistan daxilində qarşıdurmalar olmasını istisna etmir, şəxsi rəyinə görə, Paşinyan hakimiyyətini qoruyacaq, 10 noyabr bəyanatının müddəaları

qüvvədə qalacaq, hətta hakimiyyət dəyişsə də, bu öhdəliklər qüüvədən düşməyəcək: “Təxribat ola bilər, amma Azərbaycan ordusunun təxribat səviyyəsində atılan addımların qarşısını almaq üçün yetərincə gücü var.

“Moderator.az” saytında isə “Millət vəkilindən Operativ Qərargaha “operativ” atmaca: Kimə anladasan, nəyi izah edəsən..?” sərlövhəli məqalədə COVİD-19 pandemiyası əleyhinə Operativ Qərargahın fəaliyyətini deputat Fazil Mustafa şərh edir.

Depuatat vurğulayır ki, metronun, idman zallarının açılması, toylara icazə verilməsilə bağlı dəfələrlə təkliflər versə də, buna anlaşıqlı yanaşılmayıb. 

Onun fikrincə, bu məsələləri həll etmək çətin deyil, mürəkkəbləşdirilməsinin isə səbəbləri var: “Operativ Qərargah deyilən mifik bir yerdə vətəndaşların durumunu, ölkədə gerçək vəziyyəti, insanların psixoloji sarsıntısını anlayacaq dünyagörüşünə, təcrübəyə sahib mütəxəssis sıxıntısı var”, deyə deputat şərh verir.

Deputat əlavə edir ki, heyvandarlıqla məşğul olan bir sahibkar təsərrüfatının genişləndirilməsi iə bağlı xaricdən mütəxəssis dəvət edir, buna Operativ Qərargah icazə verməlidir, qərargah da pandemiya ilə bağlı buna icazə vermir.

Deputat deyir ki, dövlət rəhbərliyi sahibkarların çətin vəziyyətdə olduğunu nəzərə alıb dövlət büdcəsindən onlara yardım edir, yoxlamaların bir il də qadağan olunması barədə qanun layihəsini parlamentə göndərir: “Buradakı məmur isə iş adamına necə ziyan vurum, vətəndaşın işini necə çətinləşdirim deyə ürəyi istədiyi addımı atır. Kimə anladasan, nəyi izah edəsən?”, deyə deputat narazlığını ifadə edir.

“Bizimyolinfo.az” saytı “Bu ay yeni bahalaşma dalğası gözlənilir” sərlövhəli məqalədə qarşıdakı aylarda iqtisadi durumu iqtisadçı-ekspert Rəşad Həsənovla dəyərləndirir.

R.Həsənov deyir ki, Novruz bayramının yaxınlaşması ilə yeni bahalaşma sürprizi ola bilər. O hesab edir ki, qiymət artımı adətən bazarda təklifin azalması və ya tələbatın artması ilə ola bilər. Ekspert vurğulayır ki, bu iki göstərici ilə bağlı problem yoxdur, belə ki, nə tələbat çoxalıb, nə də təklif azalıb.

Məhsulların qiymət artımına gəlincə, ekspertə görə, artım baş verib, bahalaşmanı ilk növbədə dizel yanacağının və suyun qiymətinin qalxması ilə əlaqələndirmək olar, buna da baza inflyasiyası deyilir.

R.Həsənov deyir ki, Rusiyada son bir ayda qiymətlərin 8-10 faiz bahalaşması ticarət tərəfdaşı kimi Azərbaycana da ciddi təsir göstərir, bu təsiri azaltmaq üçün ilk növbədə daxili istehsal artırılmalı və ya alternativ mənbələrdən idxal təmin edilməlidir.

Ekspert hesab edir ki, ərzaqda əsas qiymət artımı martda müşahidə ediləcək: “Mart ayında ənənəvi olaraq kənd təsərrüfatı məhsullarında bahalaşma olur.

Bayramla bağlı tələbatın yüksəlməsi səbəbindən artım müşahidə olunacaq. Amma sonra qiymətlər yenidən sabitləşəcək”.

Onun fikrincə, Azərbaycanda bazar iqtisadiyyatının özünəxas yerli xüsusiyyəti var, yəni, kim harada, kefi necə istəyir qiymət təyin edir, qonşusu ona baxıb bir addım da irəli gedir və bahalaşmanın geri dönüşü olmur.