Media-icmal 03.07.19

Azərbaycanın mədəni irsi müdafiə təşəbbüsləri, yerli istehsalın ölkənin avtomobil bazarına təsiri, dəniz gəzintisindəki qiymətlər və s. məsələlər bugünkü (3 iyul, 2019-cu il) medianın aparıcı mövzularındandır.

Azərbaycanın mədəni irsi müdafiə təşəbbüsləri

"Azərbaycan" qəzeti "Dünya mədəni irsinin qorunması yolları Bakıda müzakirə olunur" sərlövhəli məqalədə dünya mədəni irsinin müdafiəsinin əhəmiyyətini dəyərləndirir.

Müəllif deyir ki, UNESKO-nun Dünya İrs Komitəsinin 43-cü sessiyası çərçivəsində Abidə Menecerləri Forumu (AMF) iyunun 27-də Bakıda öz işinə başlayıb, Forum yeni təşəbbüs kimi 2017-ci ildə Polşanın Krakov şəhərində işə başlayıb və artıq üçüncü dəfədir keçirilir.

Müəllifin fikrincə, Komitənin 42-ci sessiyasında Azərbaycanın bir il müddətinə komitənin sədri seçilməsi, belə mötəbər qurumların öz tədbirlərini Bakıda keçirməsini həm də Azərbaycanın beynəlxalq aləmdə artan nüfuzunun göstəricisi kimi dəyərləndirir.

Məqalədə vurğulanır ki, hazırda UNESKO-nun Dünya İrs Siyahısına 276 milyon hektardan çox ərazini əhatə edən 1000-dən çox abidə daxildir, Azərbaycandan həm İçərişəhər, həm də Qobustan qoruğu Dünya İrs Siyahısında yer alır: "Ölkəmizdə bir neçə məkanın da UNESKO-nun Dünya İrs Siyahısına namizəd kimi irəli sürülməsi nəzərdə tutulub. Hazırda Şəkinin Xan sarayı və şəhərin qədim hissəsinin, Hirkan Milli Parkının, Naxçıvandakı türbələrin bu siyahıya salınması üzərində iş gedir", - müəllif bu sahədə Azərbaycanın təşəbbüslərini yada salır.

Müəllif deyir ki, Forumda Azərbaycan nümayəndələri ölkədəki real vəziyyəti diqqətə çəkib, Bakıda, Naxçıvanda, Şəkidə, Gəncədə və s. yerlərdə görülən işlər barədə ətraflı məlumat verib, həm də bu konfransdan sonra Azərbaycanda bir neçə məkanın siyahıya salınması prosesinin sürətlənəcəyinə əminlik ifadə ediblər.

Müəllifin deməsinə görə, sessiya çərçivəsində Azərbaycanda ilk dəfə respublika sənətkarlıq festivalı keçiriləcək. Tədbir Bakıda Nizami küçəsində - Dövlət Gənc Tamaşaçılar Teatrının qarşısındakı meydanda təşkil ediləcək, tədbirə Bakı və Sumqayıt şəhərləri, habelə Abşeron yarımadasının digər yerlərindən 100-ə qədər sənətkar dəvət edilib.

Festivalda gənc nəslə, ziyarətçilərə əl işləri sənətinin texnologiyasının öyrədilməsi, nümayiş etdirilməsi məqsədilə "master club" qurulacaq və ustad dərsləri təşkil ediləcək.

Yazıda vurğulanır ki, yeni əl işləri sənətinin nümunələrinin təqdim olunması və onlara dəstək göstərilməsi üçün "wall art" və "street art" üçün şərait yaradılacaq, beləliklə, festivalı ziyarət edən şəxslər "xalçaçılar kəndi", "dulusçular məhəlləsi", "misgərlər qəsəbəsi" və s. ilə tanış olacaqlar.

Müəllif deyir ki, UNESKO-nun Dünya İrs Komitəsinin 43-cü sessiyası çərçivəsində Abidə Menecerləri Forumu öz işini Bakıda davam etdirir.

Bazara təsirsiz ötüşən - yerli istehsal

"Modern.az"da "Maşın bazarında qiymətlər artıb, azalıb?" sərlövhəli məqalə oxumaq olar.

Müəllif Azərbaycanın avtomobil bazarındakı vəziyyəti nəqliyyat sahəsi üzrə ekspert Ramil Osmanlı ilə müzkirə edir.

Müəllif deyir ki, dünyanın bir çox yerlərində olduğu ki, Azərbaycanda da avtomobil sayı hər gün artır, ilin əvvəlində ölkəyə idxal olunan avtomobillərə tətbiq olunan gömrük rüsumunun artırılmasından sonra bazarda müəyyən qədər durğunluq müşahidə olunurdu.

Avtomobil bazarında indiki duruma gəlincə, "modern.az"a danışan ekspert R. Osmanlı bildirir ki, avtomobil bazarında qiymətlərin müəyyən qədər artım müşahidə olunur və bunun səbəbləri barədə deyir: "Qiymət artımlarının əsas səbəblərindən biri mövsümlə əlaqədar bazarda təklifin azalmasıdır. Belə ki, əvvəlki dövrlərdə avtomobili satmaq fikrində olan insanlar mövsümlə əlaqədar olaraq maşınları bazardan çıxarırlar. Bu səbəbdən yay mövsümündə təklif portfelinin xeyli məhdudlaşdırılması prosesi baş verir. Bütün bunlar da bazarda qiymətlərin artmasına səbəb olur".

Ekspertin deməsinə görə, bu qısamüddətli bir dövrü əhatə edən prosesdir, belə ki, sentyabr ayına qədər qiymətlərin artımı müşahidə olunacaq, sentyabrdan qiymətlər yenidən stabilləşəcək.

R.Osmanlıya görə, gömrük rüsumunun artımının qiymətlərə təsiri psixoloji amillərlə bağlı idi: "Bazarda gömrük rüsumunun artımından sonra bahalaşma o qədər də çox müşahidə olunmur. Gömrük rüsumunun artması daha çox ölkəyə idxal olunan mühərrik həcmi böyük avtomobillərə təsir etdi. Həmin avtomobillərin idxal həcmi olduqca azaldı. Amma ümumilikdə istər gömrük, istərsə də vergi siyasətində aparılan islahatlar bütövlükdə avtomobil bazarında qiymət artımına təsir göstərir, idxalı məhdurlaşdırır".

Ekspert vurğulayır ki, idxalın məhdudlaşdırılması təklifin azalmasına gətirib çıxarır, təklifin azalması isə öz növbəsində qiymət artımına səbəb olur və proseslər bu şəkildə bir-biri ilə bağlıdır.

Yerli istehsalın avtomobil bazarındakı xüsusi çəkisinə gəlincə, Ramil Osmanlı bildirib ki, yerli istehsal hələlik bazarda tələbatın heç 5 faizini ödəmək iqtidarında və bazardakı qiymətlərə hər hansı təsir göstərmək gücündə deyil.

"Bu mənada yerli istehsalın qiymətə hər hansı təsiri yoxdur, amma gələcəkdə əgər yerli istehsalın həcmi heç olmasa 15-20 faiz həddinə gəlib çatarsa, ucuz avtomobillər üzrə rəqabətin olmasını müşahidə edə bilərik", - ekspert ölkənin avtomobil bazarındakı yerli istehsal və qiymətlərə təsir nisbətinə aydınlıq gətirib.

İndiki halda isə R.Osmanlı belə hesab edir ki, hazırkı dövrdə yerli istehsalın bazara təsirindən danışmaq hələ tezdir.

Dəniz səyahəti, VİP salon-10 manat

"Oxu.az"da isə "Bakıda dəniz gəzintiləri: Qrafiki yoxdur, hər şey havadan asılıdır" sərlövhəli məqalə diqqəti çəkir.

Müəllif yay mövsümündə Bakıda dəniz gəzintiləri və bu gəzintilərlə bağlı qiymətləri dəyərləndirir.

Müəllif deyir ki, yay mövsümündə Bakıda istirahət edən insanların üz tutduğu ilk məkan bulvar olur, burada bir sıra istirahət mərkəzləri, attraksionlarla yanaşı, gəmi ilə dəniz gəzintilərinə maraq da böyükdür.

Yazı müəllifi vurğulayır ki, amma gəmi ilə gəzintilər günün ancaq müəyyən saatlarında xidmət göstərir, elə bundan da irəli gələrək gecə saatlarında dəniz gəzintilərinin niyə təşkil olunmaması, gəmilərin xüsusi hərəkət qrafikinin olub-olmaması kimi tərəflərini incələyir.

Müəllifin deməsinə görə, "Oxu.az"ın sorğusuna cavab olaraq Dənizkənarı Bulvar İdarəsindən bildirilib ki, gəzintilər gecə saatlarına qədər davam edir: "Yay aylarında gəmi ilə gəzintilər daha sıx təşkil edilir. Sərnişinlərin tələbatına uyğun olaraq, gəzintilər təxminən saat 16:00-dan gecə yarısına qədər davam edir. Qışda isə bu müddət təxminən saat 12:00-13:00 radələrindən 20:00-a qədərdir. Yəni, gəmi ilə gəzintilər bütün fəsillərdə təşkil edilir".

Müəllif idarədəki mənbələrə istinadən bildirir ki, ümumiyyətlə, yay ayında tələbatdan asılı olaraq gün ərzində azı 5, ən çox isə 11-12 gedişə qədər gəzinti olur.

Yazıda vurğulanır ki, bulvarda sərnişinlərə iki gəzinti gəmisi olaraq "Mirvari" və "Şəfəq" gəmiləri xidmət göstərirlər.

Müəllifin deməsinə görə, "Mirvari" gəmisinin tutumu 466 nəfərdir, bu gəmidə gəzinti haqqı 5 yaşına qədər uşaqlar üçün pulsuz, 5 yaşdan yuxarı 3 manat, eləcə də böyüklər üçün sadə salonda 3 manat, VİP salonda 10 manatdır.

"Şəfəq" gəmisinin tutumu isə 60 nəfərdir, burada da 5 yaşına qədər uşaqlar üçün gəzinti pulsuz, 5 yaşdan yuxarı isə 5 manat təşkil edir.

Yazı müəllifi vurğulayır ki, dəniz gəzintilərində tələbata uyğun olaraq, əsasən "Mirvari" gəmisindən istifadə olunur, bu gəmi saat 12:00-13:00 radələrindən axşam saatlarına kimi orta hesabla gündə 6-7 səfər həyata keçirir.

Müəllifin deməsinə görə, qışda təxminən saat 12:00-13:00 radələrindən 20:00-a qədər bu gəzintilər təşkil olunur.

Müəllif deyir ki, gəmi ilə dəniz gəzintilərinin təşkilinə havanın birbaşa təsiri vardır və ümumiyyətlə, hava şəraiti imkan verdiyi təqdirdə, dəniz gəzintiləri bir saatdan bir təşkil edilir.

Yazı müəllifi gəmi ilə dəniz gəzintilərinin əvvəlcədən təyin edilən qrafikinin mövcud olmamasına diqqət çəkərək buna səbəb kimi səbəb hava şəraitini göstərir:

"İnsanların diqqətinə çatdırmaq istəyirik ki, gəminin səfərə çıxması birbaşa hava şəraitindən asılıdır, yalnız hava şəraiti imkan verdiyi halda gəmi dənizə çıxa bilər".