Media-icmal 03.12.20

İşğaldan azad edilmiş ərazilərə əhalinin qayıtması, Laçın rayonuna dəymiş ziyanın hesablanması, İkinci Qarabağ Müharibəsində Ermənistanın hərbi texnika itkisinin dəyəri, koronavirusa qarşı mübarizənin vəziyyəti və s. məsələlər medianın aprıcı mövzuları sırasındadır...

"Yeni sabah.az" saytında "Rusiya sülhməramlıları kimdir ki, onlardan icazə alaq?!" sərlövhəli məqalədə Dağlıq Qarabağdan köçən ermənilərin Rusiya sülhməramlılarının dəstəyi ilə bölgəyə qayıtması ciddi müzakirə edilir.

Müzakirələrin mahiyyəti bundan ibarətdir ki, Dağlıq Qarabağda yaşayan ermənilərlə yanaşı, regionun azərbaycanlı əhalisi də öz yurdlarına geri qayıtmalıdır.

Bu sırada Xocalı və Xankəndidən olan deputatların ofis açıb fəaliyyətə başlamaları təklif olunur.

Bu bölgədən olan deputatlar deyirlər ki, Xocalı sakinləri öz yurdlarına qayıtmaq üçün göstəriş gözləyirlər, amma bu göstərişi Rusiya sülhməramlılarından yox, Azərbaycan rəhbərliyindən gözləyirlər: "Biz də Azərbaycan vətəndaşıyıq. Rusiya sülhməramlıları kimdir ki, müraciət edib icazə istəyək. "İcazə verirsinizsə Xocalıya gələk, vermirsinizsə gəlməyək", -  deyək".

Bununla belə, deputatlar vurğulayırlar ki, doğma yurdlara qayıtmaq üçün ilk növbədə həmin ərazilər minalardan təmizlənməlidir. Bu ilkin şərtlər işğaldan azad edilən bütün ərazilər üçün yetərlidir.   

Deputatlara görə, müəyyən təhlükəsizlik tədbirləri var ki, tətbiq olunmalıdır, sonra isə qrafiklər üzrə əhali doğma torpaqlara dönə biləcəklər.

"…bunun üçün hər hans kənar qüvvədən icazə almayacağıq", deyə Rusiya sülhməramlılarından icazə alınması fikrini belə yaxına buraxmırlar.

"Redaktor.az" saytında isə "Laçın rayonuna dəyən ziyan milyardlarla manatdır" sərlövhəli məqalədə Laçın rayonuna dəyən ziyanın məbləği barədə danışılır. 

Deputat Vüqar Bayramovun açıqlamasına görə, mühüm strateji əhəmiyyət daşıyan Laçın rayonu 28 il öncə 264 vətəndaşın şəhid olduğu, 65 nəfərin girov düşdüyü və 103 sakinin əmək qabiliyyətini itirdiyi döyüşlərdən sonra Ermənistan tərəfindən işğal olunmuşdu.

Onun sözlərinə görə, Laçın rayonu iqtisadi potensialına görə də Azərbaycanda xüsusi seçilən bölgələrdən biridir.

Deputat əlavə edir ki, işğaldan öncə rayonda əsas inkişaf etmiş sahə kənd təsərrüfatı, xüsusilə də heyvandarlıq idi.

Bununla yanaşı, meyvəçilik, tütünçülük, üzümçülük, taxılçılıq, arıçılıq inkişaf etmiş sahələrdən hesab olunurdu. İşğaldan öncə Laçın rayonunda fəaliyyət göstərən sənaye müəssisələri daha çox xammal növlərinin emalına əsaslanmışdı. Deputatın sözlərinə görə, işğal nəticəsində Laçın rayonuna dəyən ziyan 10 milyard manatla ölçülür.

"Bizimyolinfo.az" saytında "Ermənistanın məhv edilmiş hərbi texnikasının dəyəri açıqlanıb" sərlövhəli məqalədə 44 günlük İkinci Qarabağ müharibəsində  Ermənistanın itirdiyi hərbi texnikanının dəyəri barədə danışılır.

Müəllif deyir ki, Azərbaycan Dövlət İqtisad Universitetinin (UNEC) alimləri Vətən müharibəsində Ermənistan ordusunun məhv edilmiş və qənimət götürülmüş hərbi texnikasının məbləğini hesablayıblar.

UNEC-in İqtisadi Araşdırmalar Elmi Tədqiqat İnstitutunun alimləri Prezidentin müraciətinə operativ reaksiya verərək, sadalanan hərbi texnikaların qiymətini hesablayıblar.

"Alimlərin əldə etdiyi nəticəyə əsasən, Vətən müharibəsində Ermənistan ordusununun məhv edilmiş və qənimət götürülmüş hərbi texnikasının dəyəri 4 milyard 8 milyon ABŞ dolları təşkil edib".

"Oxu.az" saytında isə "Pandemiya xəstəxanasının infeksionisti: Əhalinin 90 faizi gec-tez koronavirusa yoluxacaq" sərlövhəli məqalədə Azərbaycanda koronavirusla  bağlı hazırkı vəziyyət qiymətləndirilir.

Mərkəzi Neftçilər Xəstəxanasının infeksionist həkimi Natiq Əliyev bildirir ki, Azərbaycanda görülən bütün tədbirlərə baxmayaraq, koronavirusa yoluxanların sayı gündən-günə artmağa davam edir.

İnfeksionistin sözlərinə görə, son həftələrin statistikası vəziyyətin əhəmiyyətli dərəcədə yaxşılaşacağına ümid etməyə əsas vermir.

"Bu gün xəstəxanada əsasən orta və ağır vəziyyətdə olan xəstələr var. Bizdə yalnız yaşlı və xroniki xəstəlikləri olan insanlar müalicə almır; çox sayda 30-35 yaşlı və yanaşı xəstəlikləri olmayan pasiyentlər də var", - deyə N.Əliyev bildirib.

N.Əliyev deyir ki, əhalinin 90 faizi gec-tez koronavirusa yoluxacaq və hər kəs özünəməxsus şəkildə xəstəliyi keçirəcək.

Xəstəlik sayının 10 qat artmasının səbəbinə gəlincə, infeksionist buna bir neçə səbəb göstərib ki, əhalinin məsuliyyətsizliyi, pandemiyanın geridə qaldığını sanması, gigiyena qaydalarına əməl edilməməsi bu sıradadır.