Media-icmal 05.04.2016

Qarabağ cavaşı, şəhid məqamına laqeydlik, regional münasibətlər, sosial problemlər medianın aparıcı mövzusudur

“Azərbaycan” qəzeti “Qarabağ hadisələrilə bağlı yazını ilk səhifəyə çıxarıb. Yazıda Qarabağ cəbhəsindəki durum, erməni tərəfin Azərbaycanın mövqelərini və

Təmas xəttinə yaxın yaşayış məntəqlərini atəşə tutduğu deyilir. Məqalədə erməni tərəfin bu addımı atması səbəbinə toxunulur. “Məlum təxribatı Ermənistanın kimlərin tövsiyəsi, hansı havadarlarına arxalanaraq etməsini müzakirəyə çıxarmağa ehtiyac yoxdur. Əsas məsələ bunu yaradan səbəbdir-Azərbaycanın müstəqil siyasətinin dünya ölkələrinin mütləq əksəriyyəti tərəfindən qəbul edilməsi, ona hörmətlə yanaşılması və dostların, müttəfiqlərin sayının artırılması. Ermənistanın növbəti avantürasına rəvac verən, onu və arxasındakıları əsəbiləşdirən, özündən çıxaran məhz budur”.

“Belə həssas məqamda xalqın içində olun”…

“Azadlıq” qəzeti “Məmurlar şəhid dəfnlərində niyə görünmür” başlıqlı məqalədə ölkə məmurlarını şəhidlərin dəfnində iştirak etmədiklərinə görə tənqid edir. Yazıda qardaş Türkiyədə dövlət adamlarının şəhid dəfnlərində iştirakı nümunə olaraq Azərbaycan məmurlarına göstərilir və deyilir: “Amma 5 gündür ki. ölkə yarımüharibə durumundadır, rəsmi etiraf edilən 12 şəhid var və heç bir hökumət adamı gözə dəymir”. Daha sonra məqalədə bu xüsusda deputatların, nazirlərin, administrasiya təmsilçilərinin “yoxa” çıxdıqları qeyd olunur. Məqalədə bu münasibət böyük qəbahət sayılır. “Nə hansısa vəzifəlinin şəhid ailələrinə başsağlığı verdiyini görürük, nə də bu vəzifəlilərin dəfndən görüntüləri var”.

Şəhidlərin dəfni barədə öncədən məlumat verilməməsi də tənqid olunur. “Şəhidlərin nə vaxt, harada torpağa tapşırılacağı haqda da məlumat verilmir. Heç olmasa belə həssas məqamlarda baş nazir, müavinləri xalqın içinə getsinlər, təyinatla parlament kreslosunu zəbt edənlər görüntü xatirinə də olsa şəhid ailələrinin yanında olsunlar”.

Bu laqeydlik, biganəlik məqalədə belə ifadə edilir. “Nə şəhidin yanında olmağa iradələri, nə də Rusiyanın ermənipərəstliyinə etiraz etməyə cəsarətləri var”.

Son olaraq məqalədə deyilir: “Bir sözlə, “Qarabağ boyda dərdimiz var” deyənləri dərdli şəhid ailələrinin yanında görmədik. Heç olmasa ətrafda baş verənlərdən dərs çıxarmaq lazımdır. Bu da islahat aparmaq deyil ki, hökumətin maraqlarına toxunsun”.

Həmməruzəçi dəyişir, mənasızlıq dəyişmir

“Novoye Vremya” qəzetində dərc edilən “Həmməruzəçinin tanışlıq səfəri” adlı məqalədə AŞPA Monitorinq Komitəsinin Azərbaycan üzrə həmməruzəçilərinin fəaliyyəti ciddi tənqid atəşinə tutulur. Həmməruzəçi Ştefan Şenonnun səfəri ərəfəsində həmməruzəçilər dəyişildiyi deyilsə də səfərlərin mənasızlığının dəyişmədiyi iddia edilir.

Eyni zamanda bu həmməruzəçilərin vətəndaş cəmiyəti institutları ilə təmaslara ciddi yanaşmamaları tənqid olunur. “Vətəndaş cəmiyyəti və xüsusilə jurnalistlərə münasibətdə “qalan vaxt” prinsipilə hərəkət edirlər. Dəfələrlə olub ki, həmməruzəçilər mediaya əvvəlcədən planlaşdırılan görüşləri ləğv ediblər. Eyni hərəkət vətəndaş cəmiyyəti təmsilçilərinə qarşı da edilib”.

Müəllif Azərbaycana münasibətdə ərazi bütövlüyünün təmin olunması məsələsində AŞPA-nı ardıcıl olmamaqda günahlandırır. “Bizim ölkə ilə münasibətdə bu təşkilatı daha çox geosiyasət və enerji məsələləri maraqlandırır”.

Məqalədə Azərbaycanda insan haqları məsələsinin bu qurumun diqqətindən kənarda qaldığı deyilir. “Çox zaman insan haqları məsələsindən merkantil məqsədlərə nail ola bilmək üçün vasitə kimi istifadə olunur. Rəsmi Bakıdan geosiyasi və enerji məsələlərində güzəştlər tələb edildikdə insan haqlarının pozulmasına görə tənqid səslənir”.

Yazıda demokratiyanın xalqın özünə daha çox lazım olması vurğulanaraq qeyd edilir. “Demokratiya, insan haqlarına hörmət və vətəndaş cəmiyyətinin inkişafı bizim özümüz üçün zəruridir. Deməli, ortaya çıxan bütün problemləri də öz gücümüzlə həll edə bilərik”.

Müharibə, manat, məzənnə    

İqtisadı ekspertlər “Yeni Müsavat” qəzetinə açıqlamalarında müharibə şəraitinin manatın məzənnəsinə təsiri məsələsini araşdırıblar.

Ekspert Əkrəm Həsənov manatın məzənnəsinin ucuzlaşmamasına səbəb kimi ölkədə sərbəst maliyyə bazarının olmamasını göstərir. “Ölkədə sərbəst maliyyə bazarı yoxdur. Digər ölkələrdə səhmlər və milli valyuta ona görə düşür ki, orada sərmayəçilər var. Biz də onsuz da manatla  xarici sərmayəçilər yoxdur, milli valyuta onsuz da dəyərdən düşüb və yalnız inzibati yolla saxlanılır”.

Ekspert Natiq Cəfərliyə görə isə hadisələrin manata birbaşa təsiri əsasən ölkəyə gələn valyuta ilə bağlıdır. “Təbii ki, ölkəyə gələn valyuta azaldıqca manatın dəyərdən düşməsi də sürətlənir. Mərkəzi Bank dolların məzənnəsini heç bir əsas olmadan aşağı salır. Yəni,  bunun ciddi iqtisadi əsasları yoxdur. Müharibə şəraiti olarsa milli valyuta dəyərdən düşə bilər. Bütün müharibə şəraitində olan olan ölkələrdə həmişə nilli valyuta dəyərdən düşür”.

Ekspert Qubad İbadoğlu manatın məzənnəsilə münaqişənin arasında ciddi birbaşa əlaqənin görmədiyini deyir. “Azərbaycan manatı valyuta bazarındakı tələb və təklif tarazlığından asılıdır. Bu tələbləri formalaşdıran ehtiyaclarımıaz var.Təklifimiz də neftin dünya bazarında qiymətindən asılıdır”.

Park olmasın, göydələnlər olsun

“Bizm Yol” qəzeti “metronun “Azadlıq” stansiyası yaxınlığındakı parkda aparılan tikinti işlərinin metro stansiyasında təhlükə yaratdığını bildirir. “Metronun üstündə göydələnlər tikilir”  sərlövhəli məqalədə bu məsələ araşdırılır.

“Ölkənin iki sütunsuz metro stansiyasından biri olan “Azadlıq prospekti”ndə çatların əmələ gəldiyini müşahidə etdik. Burada nəmişliyin yaratdığı izləri də görmək çətin deyildi”. 

Amma yazıda ən maraqlı məqam kimi “Bakı Metropoliten” QSC-nin  stansiyanın üstündə tikilən obyektlərin stansiyaya hər hansı ziyanı olmadığını deməsini göstərir.

Yazıda bu da qeyd edilir ki, stansiyasının yaxınlığındakı parkın salınmasına 2Ş6 milyon manat vəsait xərclənib.