Media-icmal 05.05.21

Rusiya və İranın Azərbaycana sayğısızlığı, karantin rejiminin yumşaldıla bilməsinin mümkünlüyü, problemli kreditlərin artması və Azərbaycanda azad iqtiasadi zonaların yaradıla bilməməsinin səbəbləri, Şuşada parad keçirilməsinə reaksiyalar və sair medianın aparıcı mövzuları sırasındadır. 

“Yenisabah.az” saytında yer alan  “Ruslar səlahiyyətini aşdı, Dövlət Sərhəd Xidməti Laçın dəhlizinə girməlidir” sərlövhəli məqalədə keçmiş xarici işlər naziri Tofiq Zülfüqarov Rusiya və İranı Azərbaycana qarşı özbaşınalıqda ittiham edir. Onun deməsinə görə, İran rəsmi Bakının razılığı və icazəsi olmadan Rusiyanın  müvəqqəti nəzarətində olan ərazilərə yardm göndərir.

Onun deməsinə görə, sosial şəbəkələrin İran seqmentində bu ölkənin Ermənistan vasitəsilə Rusiya sülhməramlılarının nəzarətində olan Azərbaycan ərazilərinə “yardım” göndrilməsini əks etdirən qalmaqallı görüntülər yayılıb.

Politoloq deyir ki, bu yardımların Ermənistandan Laçın dəhlizi vasitəsilə edilməsi və Azərbaycanın məlumatsız olması beynəlxalq qanunların, o cümlədən 2020-ci il 10 noyabr üçtərəfli bəyanatının ciddi şəkildə pozulmasıdır.

Eks-nazir əlavə edir ki, Rusiya sülhməramlılarının Ermənistan vasitəsilə müvəqqəti onların nəzarətində olan Azərbaycan ərazilərinə “humanitar yardım” çatdırmaq səlahiyyəti yoxdur.

Tofiq Zülfüqarov deyir ki, bu, Azərbaycan Dövlət Sərhəd Xidmətinin səlahiyyətində olan məsələdir, odur ki, artıq Laçın dəhlizində Azərbaycan Dövlət Sərhəd Xidmətinin fəaliyyətə başlaması zərurətə çevrilib.  

“Modern.az”  saytında yer alan “Karantin rejimi yumşaldıla bilər, amma o şərtlə ki...” sərlövhəli məqalədə karantin rejiminin yumşaldıla bilməsi şərtləri Milli Məclisin Sosial siyasət komitəsinin sədri Musa Quliyevlə müzakirə edilir.

Komitə sədri bir ildir ki, koronavirus infeksiyasına dünya miqyasında mübarizə aparıldığını deyir, son günlərdə Azərbaycanda koronavirusa yoluxmada azalmalar qeydə alındığı vurğulanır. Bundan irəli gələrək müəllif karantin rejimində yumşaldılmaların ola bilməsi mümkünlüyünü dövrəyə gətirir.

Komitə sədri deyir ki, hazırda Azərbaycanda vaksinasiya prosesi davam edir, bu daha da sürətlənsə karantinin sərtləşdirilməsinə zərurət yoxdur, epidemiya əleyhinə tədbirlərə əməl edilməsi yetərlidir. O hesab edir ki, əhalinin  təxminən 40-45 faizi vaksinasiyaya cəlb olunsa, bütün qadağaları qaldırmaq, əvvəlki həyata qayıtmaq olar.

“Sfera.az”  saytı isə problemli kreditlərin artmasını deputat Vüqar Bayramovla müzakirəyə çıxarır.

Vüqar Bayramov deyir ki, 2021-ci ilin birinci rübünün yekununda problemli kreditlərin həcmində artımlar davam edib.

Deputat Mərkəzi Banka istinadən deyir ki, vaxtı keçmiş kreditlərin həcmi ötən ilin son ayında 893,1 milyon manat idisə, bu göstərici bu ilin yanvarında 900,4 milyon, fevralda 917,5 milyon və nəhayət, martın sonlarında 918,2 milyon manata çatıb.

Mərkəzi Bankın məlumatına görə, fiziki şəxslərin əmanətləri bu ilin martında azalıb. Belə ki, fevral ayında vətəndaşların banklardakı əmanətləri 8 milyard 379 milyon manat olsa da bir ay sonra bu göstərici 8 milyard 147 milyon manata düşüb.

Vüqar Bayramovun sözlərinə görə, bank sektorunda islahatların dərinləşdirilməsinə ehtiyac var:  Mərkəzi Bank sektorunda rəqabəti gücləndirməklə kredit faizlərinin azalmasına, depozit və kredit siyasətləri arasındakı mütənasibliyin möhkəmləndirilməsinə nail oluna bilər.

“Bizimyolinfo.az”  “Deputat: Baş qarışıb dövlət əmlakını özəlləşdirib xaricə satmağa” sərlövhəli məqalədə Azərbaycanda  azad iqtisadi zonaların yaradılmamasının səbəbləri deputat Razi Nurullayevlə müzakirə edliir.

Deputat deyir ki, Azərbaycan 2021-ci ilə çatdı, lakin azad iqtisadi zonaların yaradılması barədə qanunvericilik dünya standartlarına hələ də uyğunlaşdırılmayıb.

Onun deməsinə görə, XX əsrin 90-cı illərinin ortalarında Birləşmiş Millətlər Təşkilatının regional məsələlər üzrə bir əməkdaşı Azərbaycanda azad ticarət zonasının yaradılması üçün çalışsa da bu işə start verilmədi: “Açıq deyirdi ki, məmurlar ona imkan vermir. Məmurlar yalnız özləri üçün düşünürdülər, bu işdən onlara nə xeyir dəyəcəyini soruşurdular. 2021-ci ildir hələ də qanun yoxdur. Baş qarışıb dövlət əmlakını özəlləşdirib xaricə satmağa, torpaqları özəlləşdirib ələ keçirməyə”, - deputat deyib.

Deputat dünyada mövcud olan azad iqtisadi zonaların Azərbaycanda yetərli fəaliyyət göstərə bilmədiyini  deyir, xarici mütəxəssislərin dəvət olunmasını təklif edir.

“Müsavat.com”  saytı “8 mayda Şuşada hansı formada tədbir keçirək-iki rəy” sərlövhəli məqalədə Şuşada Azərbaycan miqyaslı tədbirin keçirilə  bilməsi deputatlarla müzakirə edilir.

Xatırladaq ki, Şuşa şhəri 1992-ci il mayın 8-də işğal edilmişdi, 2020-ci il noyabrın 8-də İkinci Qarabağ Müharibəsində azad edilib.

Müəllifə görə, təkliflər var ki, mayın 8-də Şuşada hər hansı bir formada tədbir keçirilsin, bu həm də mayın 9-da Rusiya sülhməramlılarının Xankəndində parad keçirmək istəyinə cavab olsun.

Müəllif yada salır ki, deputat Fazil Mustafa Azərbaycan-Türkiyə hərbi qüvvələrinin Şuşada birgə hərbi paradının keçirilməsini təklif etmişdi.

Müəllif deyir ki, Türkiyə ilə bu tədbirin hazırlıq planı tərtib olunmalıdır, çünki Ramazan ayından sonra Türkiyə və Azərbaycan prezidentləri Şuşaya səfər edəcəklər, bu səfər zamanı da belə bir  paradın keçirilməsi variantını  düşünmək olar.

Deputat Aqil Abbas da Şuşada parad keçirilməsini məqbul sayır, həm də mayın 9-da Xankəndidə Rusiyanın parad keçirməsinə razılıq verilməməsini xüsusi vurğulayır. 

Keçmiş deputat Fərəc Quliyevin fikrincə, parad keçirmək üçün çox az vaxt qalır, hazırlıqları başa çatdırmaq olmaz, amma Şuşada məktəb, konsulluq açıla bilər. Orada Türkiyənin hərbi bazası yerləşdirilə bilər, məsələyə daha köklü şəkildə baxmaq olar. Rusiya sülhməramlılarının mayın 9-da Xankəndidə parad keçirmək istəklərinə gəlincə, keçmiş deputat bunu yolverilməz sayaraq Rusiyaya nota verilməsini təklif edir.