Media-icmal 06.02.21

“Moderator.az” saytı isə “Bu gün də vəzifədə oturub tamahını idarə edə bilməyən məmurların sayı kifayət qədərdir..” sərlövhəli məqalədə müəllif məmur özbaşınalığını ekspertlərlə müzakirəyə çıxarır.

Ekspertlər konkret olaraq “Azərsu”yun Tarif Şurasına müraciəti, bu müraciətə əsasən fevralın 1-dən əhaliyə verilən suyun və tullantı sularının tariflərinin 100% bahalaşdırılmasını  həm məmur özbaşınalığı, həm də dövlət və xalq vəsaitlərinin  mənimsənilməsi kimi dəyərləndiriblər.

Digər tərəfdənsə ekspertlər hesab edirlər ki, məmurların belə davranışı həm xalqa, həm də dövlətə xəyanətdir.

Ekspertlər  son vaxtlar “Azərsu” və “Azərqaz”ın su və qaz sayğaclarını bir neçə dəfə dəyişdirməsini mənasız maliyyə itkiləri, korrupsiya əməli, əhalinin “cibi”nə girmək kimi təfsir edilər.

Ekspertlər iddia edirlər ki, yeni qaz sayğaclarının tətbiqindən sonra qaz sərfiyyatı artıb, eləcə də su sayğacları sərfiyyatı işlədildiyindən çox göstərir.

“Apardığımız müşahidə göstərir ki, 10 tonluq su çəninə sayğacla 10 ton su vuranda ən yaxşı halda çənə 7 ton su yığılır. Deməli, bu yolla vətəndaşdan 3 ton su oğurlanır” deyə ekspertlər sayğacların “hiylələri”nə diqqət çəkirlər.

Ekspertlərə görə, “Azərişıq” sahibkarlıq müəssisəsində yanıb sıradan çıxmış kabeli, sadəcə, dəyişmək üçün sahibkara elə qiymət oxuyur ki, iş adamı biznesi tamamilə bağlayıb-bağlamamaq dilemması ilə üzbəüz qalır.

“Yenisabah.az”  saytı isə “Qiymət artımlarına dair əsaslandırmalara xalq niyə inanmır?” sərlövhəli məqalədə müəllif rəsmilərin qiymət artırılması ilə bağlı izahlarına əhali kütlələrinin niyə inanmaması səbəblərini ekspertlərlə müzakirə  edirlər.

Mövzu ona görə akrualdır ki, Azərbaycan Tarif Şurası 2021-ci il yanvarın 4-də benzin və düzelin, yanvarın 31-də isə əhaliyə verilən suyun və tullantı sularının tariflərini artırıb.

Tarif Şurası bu qiymət bahalaşdırılmasının hansısa “zərurətlər”dən irəli gəldiyini desə də əhali bunları əsassız saydı və inanmadı.

İqtisaçı-ekspert Rəşad Həsənov isə deyir ki, əhalinin bu əsaslandırmalara inanmaması hökumət sözünə etimadının olmamasının göstəricisidir.

“Xüsusilə sosial əhəmiyyətli sahələrdə əsaslandırmalar gizli şəkildə, informasiya açıqlanması, hər hansı monitorinq nəticəsi olmadan aparılırsa, ekspert qiymətləndirmələri, ictimai institutlarla müzakirələr yoxdursa, bu zaman təbii ki,     ictimaiyyət belə əsaslandırmalara inanmayacaq”,  - R.Həsənov inamsızlığın səbəblərini göstərir.

Ekspert deyir ki, dövltin əlində olan kommunal sektorda korrupsiya aradan qalxmayınca, qiymətlərin optimal səviyyəsinə nail olmaq mümkün deyil, bu sektorda itkilər dünya ortalaması ilə müqayisədə dəfələrlə yüksəkdir. 

“Bakipost. az” saytı isə “Korrupsioner məmurlar: Niyə sonradan azadlığa çıxırlar?” sərlövhəli məqalədə müəllif bu suala iqtisadçı-ekspert Natiq Cəfərli ilə cavab axtarır.

Müəllif deyir ki, korrupsioner sabiq məmur Səlim Müslümov,  “Baku Stell Company”nin rəhbəri Rasim Məmmədov həbs alınıb. Müəllifə görə,  belə şəxslərin həbsindən daha vacibi oğurladıqları vəsaitləri dövlətə qaytarmaqdır.

Ekspert N.Cəfərli isə deyir ki, məmurların oğurladıqlarını geri almaq mexanizmi olmalıdır: “Bu mexanizm şəffaf və işlək olmalıdır. Bunun üçün məhkəmə qərarları əsaslandırılmış şəkildə olmalıdır.  Ona görə də adı korrupsiya ilə bağlı hansısa bir məsələdə keçən insanların əməlləri ilk növbədə çox ciddi araşdırılmalı və korrupsiya əməli sübut olunmalıdır”.

N.Cəfərli hesab edir ki, korrupsiyanı tam aradan qaldırmaq üçün təkcə Cinayət Məcəlləsi dəyişməli deyil, ümumilikdə yeni qanunvericilik təşəbbüsləri lazımdır: “Çünki görünən odur ki, bir müddətdən sonra korrupsiyaya görə tutulan bəziləri azadlığa çıxırlar. Sanki heç nə baş verməyib. Ona görə də yeni qanunvericilik təşəbbüsləri lazımdır.