Media-icmal 06.05.2016

Mərhum dövlət başçısı Heydər Əliyevin siyasi fəaliyyəti, kreditlər sahəsində yaranan problemlər, Ermənistanın “Dağlıq Qarabağı” “tanıması” cəhdləri, ekspert şərhləri bugünkü medianın aparıcı mövzusudur. 

Azərbaycançılıq ideyası –müəllif  Heydər Əliyev

Mərhim president Heydər Əliyevin mayın 10-da anadan olmasının növbəti ildönümü ilə bağlı Azərbaycan qəzeti irihəcmli çoxsaylı məqalələr dərc edib.

“Azərbaycanın rəmzi” adlı məqalədə respublika Ağsaqqallar Şurasının sədri Fəttah Heydərov  H.Əliyevin dövlətçilik  fəaliyyəti, xüsusilə azərbaycançılıq prinsipi ilə  bağlı öz düşüncələrini bölüşür.

“Ən əsası azərbaycançılıq ideyası Heydər Əliyev tərəfindən milli kimliyimizin ideoloji göstəricisi miqyasını aşdı. Eyni zamanda artıq bu ərazidə yaşayan bütün etnosların birləşdirici gücünə çevrildi. H.Əliyevin azərbaycançılıq ideyası həm də mükəmməl bir ideologiyadır. Azərbaycanda yaşayan bütün insanları ayrı-seçkilik qoymadan vahid amal, vahid dövlət, vahid maraqlar ətrafında birləşdirir”.

Müəllifin düşüncəsinə görə, H.Əliyevin müəllifi olduğu azərbaycançılıq ideyasının məğzini təşkil edən prinsip budur ki, müxtəliflik, istər milli, istər dini baxımdan olsun bizi ayırmır, əksinə birləşdirir.    

Xalqla müharibə

“Azadlıq” qəzeti kredit borcları ilə bağlı qanunvericiliyə dəyişiklik edilərək borcu ödəməyənlərin borcun 2 mislindən 4 mislinə kimi cərimə olunmasını hakimiyyətin xalqla müharibəsi adlandırır.

Nəzərdə tuutlan dəyişiklik məqalədə belə dəyərləndirilir: “Deməli, kredit borcunu ödəyə bilməyənlərə “qəsdən ödəmirsən” ittihamı irəli sürüləcək və bu yolla vətəndaş daha böyük borcla yüklənəcək”.

Məqalədə hakimiyyətin bu addımı tələ adlandırılır və kiminsə borcdan bilərəkdən yayınması absurd sayılır. “Dünənə qədər vaxtında ödəniş edən adam bu gün ödəniş qabiliyyətini itirib və bunun faktiki əsasları var. Əgər iri market sahibləri üsyan edirsə, böyük şirkətlər fəaliyyətlərini dayandırırsa, sadə vətəndaşların vəziyyətini təsəvvür etmək çətin deyil”.

Məqalədə bu dəyişikliklərin mahiyyəti belə aydınlaşdırılır: “Hökumət yaranmış problemin həllinə nail olmaq, həqiqi antiböhran tədbirləri həyata keçirmək əvəzinə xalqa müharibə elan edir. Mənasız  layihələrə milyardlar xərcləyən zehniyyət əhalinin borc yükünü azaltma üçün heç bir addım atmır”.

Müəllifin düşüncəsinə görə, əgər hakimiyyət güzətlərə getmirsə, o zaman xalq da 120 milyard neft pulunun hesabını hakimiyyətdən sormalı olduğunu deyir. “Əks halda bu kredit bataqlığı çoxları üçün cəhənnəmə çevriləcək”.  

Bu, müharibə təxribatıdır

“Novoye Vremya” qəzeti “Ermənistan müharibə təxribatı törədir” sərlövhəli məqalədə rəsmi İrəvanın “”Dağlıq Qarabağı” qanunvericilik səviyyəsində tanımaq istəməsi cəhdləri haqda yazır.

Məqalədə erməni tərəfin bu addımı atmasına görə problemin vasitəçiləri olan ATƏT-in Minsk Qrupu ciddi tənqidə məruz qoyulur. “Mins Qrupu yalnız apreldə əməliyyatlar başladıqdan sonra buna reaksiya verir. Amma Azərbaycan tərəfin təmas xəttinə yaxın yerdəki əhalisi atəşə tutulanda susurdu”.

Müəllif erməni tərəfin “Dağlıq Qarabağı” diplomatik səviyyədə tanımaq cəhdlərini elə diplomatik səviyyədə “müharibə təxribatı” kimi dəyərləndirir.

Erməni tərəfin son anda bu sənədi parlament baxışına çıxarmaması irimiqyaslı hərbi əməliyyatların başlaya bilməsi təhlükəsindən doğan qorxu ilə bağlı olduğu vurğulanır. “Amma heç kəs zəmanət verə bilməz ki, bu məsələ bir də qaldırılmayacaq, odur ki, vasitəçilər məsələyə vaxtında reaksiya verməlidirlər”.

Daha sonra məqalədə sərhədlərin toxunulmazlığı ilə müqəddəratın təyin edilməsi məsələsinin bir müstəvidə həlli mümkünsüz sayılır və birincinin daim öndə olmasının zəruriliyi vurğulanır.

Ümumiyyətlə, müharibə təhlükəsini aradan qaldırmaq üçün isə müəllif qeyd edir: “Bunun əsas səbəbi olan işğal faktı aradan qaldırılmalıdır. 24 ildir danışıqlar gedir, amma nəticə yoxdur. Ermənistanın Qarabağı tanımaq istəməsi problemi sülh yolu ilə əll etmək istəməməsi anlamına gəlir. Odur ki, erməni tərəfi işğala son qoymaq üçün beynəlxalq birliyin təzyiqini hiss etməlidir”.

N.Cəfərli: “Hökumətin özünü “ASAN”laşdırmaq lazımdır”

“Bizim Yol” qəzeti “Asan Kommunal” mərkəzlərinin yaradllması haqda dövlət başçısının fərmanını eskpertərlə müzakirə edir. Ekpsert Natiq Cəfərli “ASAN-xidmət”in özünü müsbət tərəfdən doğrultduğunu desə də bu qurumun yeni-yeni xidmətlərlə yüklənməsini belə dəyərləndirir: “ASAN Kommunal”ın yaradılması ilə və “ASAN-xidmətə yaxınlaşdırılması bu sahədəki problemləri xidmətin vasitəsilə həll etmək səyləridir. İstər Bakıda, istər ölkənin rayonlarında kommunal xidmət sahəsində çoxsaylı problemlər var”.

Bundan irəli gələrək ekspert maraqlı bir təklif də verir: “Amma “ASAN xidmət” uğurlu modeldirsə, özünü doğruldursa, obrazlı desək hər şeyi “ASAN-xidmətə verməkdənsə hakumətin özünü “ASAN”laşdırmaq lazımdır. Yəni, “ASAN xidmət”in təcrübəsindən hökumət və dövlət qurumlarında istifadə etmək lazımdır ki, tək kommunal sahədə yox, digər sahələrdə də hökumətin işləməsi “ASAN xidməti”nə yaxın olsun”. Ekspertə görə, bu addım  daha çox pozitiv dəyişikliklərə gətirib çıxara bilər”.