Media-icmal 06.05.21

“Azxəbər.com” saytında yer alan “Millət vəkilindən ictimai nəqliyyatla bağlı qadağaya sərt reaksiya” sərlövhəli məqalədə deputat Vüqar Bayramov  həftəsonu ictimai nəqliyyatın fəaliyyətinə qoyulan qadağanı tənqid edir.

Deputatın sözlərinə görə, hələlik heç bir ölkədə və elmi araşdırmalarda qeyri-iş günlərində və ya həftəsonlarında ictimai nəqliyyatın işləməməsinin yoluxma sayına təsirini ölçə bilən konkret metodlar yoxdur.

Deputat hesab edir ki, bu baxımdan qeyri-iş günlərində və həftəsonlarında ictimai nəqliyyatın fəaliyyətinin bərpası məqsədəuyğun olardı.

Deputata görə, günün aktiv saatlarında nəqliyyatın işinin bərpası daha zəruridir və bu, qeyri-iş günlərində müşahidə edilən ictimai nəqliyyat probleminin də həllinə səbəb olar.

“Bizimyolinfo.az” saytı isə “Rüsum adı ilə vətəndaşdan yığılan pullar – maya dəyərindən qat-qat baha sənədlər” sərlövhəli məqalədə müəllif vətəndaşların hansısa sənəd üçün müraciət etdikdə onlardan tələb edilən rüsumun baha olmasını gündəmə gətirir.

Müəllif deyir ki, Azərbaycan vətəndaşları dövlətin idarəetmə xərclərini vergilərlə öz üzərinə götürüb və bu formada vətəndaşlardan təkrar pul yığılmasına son qoyulmalıdır. Onun sözlərinə görə, vətəndaş vəsiqəsini itiribsə, ya xarab edibsə, onda təkrar rüsum ödəyə bilər, amma sənədin dəyişdirilməsinin vaxtı çatıbsa, buna görə təkrar pul ödəməməlidir.

İqtisadçı Natiq Cəfərli də hesab edir ki, Azərbaycanda  vergi sistemi qurulmadığı üçün qeyri-rəsmi olaraq dolayı vergiləndirmə sistemi yaranıb. Onun sözlərinə görə, bunun tərkib hissəsindən biri də sənədlərlə bağlı məsələrdir və rüsum ödənilməsi də məhz buna bağlıdır. O vurğulayır ki, burada ən vacib məqamlardan biri odur ki, dövlət hansısa bir xidməti göstərirsə, bundan qazanc əldə etməyi düşünməməlidir.

“Əgər xidmət maya dəyərindən qat-qat artıq qiymətə başa gəlirsə, burada dövlət vətəndaşdan əlavə gəlir götürmə haqqında düşünməməlidir”. İqtisadçıya görə, heç olmasa hansısa xidmət haqqını götürsünlər, maya dəyərinə hesablanmış qaydalar olsun”.

O əlavə edib ki, xarici pasport 40 manata satılır, hətta tez almaq istədikdə 150 manat tələb edirlər, bu, dolayı vergiləndirmə sistemidir və bu illər ərzində ölkədə normal vergi sistemi qurulmayıb.

“Modern.az” saytında “Lavrovun çantasındakı “Hadrut planı” sərlövhəli məqalədə müəllif Lavrovun Ermənistan səfərini və ermənilərin Ermənistan Xarici İşlər Nazirliyi önündəki aksiyasını dəyərləndirir.

Müəllif hesab edr ki, Lavrovun mayın 5-də Ermənistana səfəri zamanı aksiya keçirilməsi təsadüf və ya təkcə “Hadrut erməniləri”nin aksiyası deyil.

Müəllif diqqəti ona çəkir ki, ermənilər Rusiya sülhməramlılarının nəzarət etdiyi ərazilərə yox, məhz Azərbaycanın nəzarətində olan Hadruta qayıtmağı tələb edirlər: “Bu, erməni qoşunlarının Qarabağdan çıxarılmasından sonra ehtiyatda saxladıqları “Hadrut planı”nın tərkib hissəsidir. Çünki, ermənilərin Hadruta qayıtması rus sülhməramlılarının da bu əraziyə daxil olması deməkdir və burada iki hədəf var”, deyə müəllif bildirir.

Onun fikrincə, burada siyasi hədəf ermənilərin Hadruta qayıtması ilə “status” məsələsində perspektiv imkanlar əldə etməkdir. Hərbi cəhətdən isə Hadrut Şuşa, Laçın, Xankəndi ilə sərhəddir.

Müəllif deyir ki, ermənilər qayıdarsa və Hadrutda rus sülhməramlıları yerləşərsə, Rusiya bütün Araz boyu istiqamətinə - Cəbrayıla, Füzuliyə, Qubadlıya, Zəngilana nəzarət imkanı qazanır.

Müəllifə görə, Lavrovun İrəvana gəlişi günü eyni tələblər yenidən gündəmə gətirilirsə, bu, erməni mülki əhalinin Hadruta qayıtmasına şəraitin yaradılması məsələsinin Rusiya baş diplomatının Bakıya gətirəcəyi təklif-istək siyahısında yer alacağı ehtimalını önə çıxarır.

Müəllif vurğulayır ki, bununla Moskva erməni qoşunların çıxarılmasından sonrakı dövrdə Qarabağda strateji üstünlük qazanmağa çalışır.

“Moderator.az” saytında isə “Bu xaotik vəziyyətin yaradılmasının səbəbkarı kimdir? – Bu məsələ də BNA-nın işi deyilmiş” sərlövhəli məqalədə sərnişindaşıma sahəsindəki nizamsızlıq problemi müzakirə olunur. 

Müəllif deyir ki, ölkədə metropoliten xeyli vaxtdır ki, fəaliyyət göstərmir, metro stansiyaları arasında hərəkət edən avtobusların fəaliyyəti isə problemi həll edə bilmir, avtobus dayanacaqlarında olan sıxlıq isə infeksiyaya yoluxma riskini artırır.   

Müəllifə görə, o avtobusların hansı qaydalarla fəaliyyət göstərdiyi ciddi suallar doğurur və bunlardan biri həmin avtobusların sürücülərindən qanunsuz alınan haqlardır.

Müəllifin sözlərinə görə, adlarının çəkilməsini istəməyən bir neçə nəfər sürücü deyir ki, o haqları ödəməsələr bir gün belə işləyə bilməzlər: “Bu sahəyə nəzarət edən konkret adamlar var, gün ərzində edilən reysləri sayırlar. Əgər “hörmət”lərini etməsək bizə işləməyə imkan verməzlər”, sürücülər belə deyirlər.

Sürücülər əlavə edirlər ki, dövlət qeydiyyatına alınmamış avtonəqliyyatdan istifadə qadağandır.

Bakı Nəqliyyat Agentliyi isə bəyan edir ki, qurum metrostansiyaar arasında xidmət göstərən həmin avtobuslara fərqlənmə nişanı verməyib, ona görə də onların fəaliyyəti tam qanunsuzdur.

Bundan irəli gələrək, müəllif “bəs bu xaotik vəziyyətin yaradılmasının səbəbkarı kimdir?” sualını ortaya qoyur.