Media-icmal 08.02.21

“Müsavat.com”  saytı “Yanacağın keyfiyyət problem: 85 faiz sürücü narazıdır-ekspertlər deyirlər ki…” sərlövhəli məqalədə müəllif ölkədə yanacağın keyfiyyətini ekspertlərlə dəyərləndirir.

Müəllif Media Təhlil Mərkəzinin 2021-ci il yanvarın 6-11-də keçirdiyi  soğruya istinadən deyir ki, respondentlərin 85%-i  satılan yanacağın keyfiyyətindən narazı, 15%-i isə razıdır. Sorğuya əsasən böyük əksəriyyət olmaqla  respondentlərin 65%-i Aİ-92 markalı benzindən istifadə edir.

Müəllif əlavə edir ki, bu il yanvarın 4-də  Tarif (qiymət) Şurasının qərarına əsasən AI-92 markalı avtomobil benzininin pərakəndə satış qiyməti 1 litr üçün 1 manat, dizel yanacağının pərakəndə satış qiyməti isə 1 litr üçün 80 qəpik müəyyən edilib.

Ekspertlər isə deyirlər ki, benzinin keyfiyyətinin aşağı olması bir neçə dəfə gündəmə gətirilib, amma rəsmi qurumlar bu məlumatları təkzib ediblər. Ekspertlər  “təmiz hava” aylığı aksiyası çərçivəsində saxlanılan sürücülərin 90 faizi  avtomobilin zəhərli qazının miqdarının çoxluğunu yanacaqla bağlayırlar.

Ekspertlərə görə, keyfiyyətsiz yanacaq təkcə havanın zəhərləyən qaz deyil, həm də bunun nəticəsi olaraq xəstəliklərin artması mənbəyi, avtomobilin detallarının daha tez sıradan çıxması, avtomobil sahibinin nəzərdə tutmadığı vəsait xərclənməsi deməkdir.

Ekspertlər vurğulayırlar ki, SOCAR-ın açıqlamasına görə, yanacağın keyfiyyətinin artırılması hələ 2022-23-cü illərdə baş tutacaq.

“Modern.az” saytı isə “Sülhməramlılar yerləşdiriləndən sonra gücü olanlar çevriliş niyyətinə düşdü” sərlövhəli məqalədə müəllif Qarabağda Rusiya sülhməramlılarının yerləşdirilməsinin Azərbaycana təsirini deputat Vahid Əhmədovla dəyərləndirir.

Deputat sensasion açıqlama verib: “Azərbaycanda təmizləmə prosesi getməlidir. Bir şeyi diqqətə çatdırım ki, Qarabağda rus sülhməramlıları yerləşdiriləndən sonra Azərbaycanda “5-ci kolon”  dirçəldi, sanki onlara ikinci dəfə nəfəs verildi. Öz “böyükləriylə” məsləhətləşmələr apararaq Azərbaycanda müəyyən oyunlar qurmağa başladılar. Kifayət qədər pulu, gücü olanlar dövlət çevrilişi etmək niyyətinə düşdülər”. 

Deputat hesab edir ki, kadrların təmizlənməsi prosesi davamlı olmalıdır:  “...bu prosesin davamlı olmaması qeyri-mümkündür. Çünki vəziyyət elə bir səviyyəyə çatıb ki, həllsiz qala bilməz. Son illər çox sayda kadr dəyişikliyi aparılıb, vəzifəyə gənc, Avropa təhsilli kadrlar gətirilib.Yenilər müəyyən səhvlər buraxacaqlar, amma onlar Azərbaycan dövlətinə xəyanət etməyəcəklər, Azərbaycanın müstəqilliyinin əleyhinə addım atmayacaqlar, heç vaxt ciddi korrupsiya faktlarına görə istintaq edilməyəcəklər” deyə deputat təmizlənmənin vacib olmasının səbəbini göstərir.

Deputata görə, 20-25 il vəzifədə olan kadrlar harınlaşmış kadrlardır, kifayət qədər vəsait toplamış, vəsaitləri xaricə çıxarmış oliqarxlardır, heç kəsi eşitmirlər və buna görə də dövlət üçün həmişə təhlükədirlər”.

“Yenisabah.az” saytı isə "Xankəndi, Xocalı və digər ərazilərimizdə suverenliyimizin bərpası üçün iki əsas məsələ həll edilməlidir” sərlövhəli məqalədə müəllif qoyulan məsələni keçmiş xarici işlər naziri Tofiq Zülfüqarovla müzakirə edir.

Eks-nazir Xankəndi, Xocalı və Yuxarı Qarabağdakı digər Azərbaycan ərazilərinin taleyini çox yaxşı gördüyünü, bu ərazilərdə Azərbaycanın suverenliyinin bərpası prosesinin başladığını bildirir.

Onun fikrincə, indiki mərhələdə isə qarşıda əsas iki məsələ var: “Birincisi, “Qarabağın özünümüdafiə ordusu” adı altında yerləşdirilmiş Ermənistan ordusu   həmin ərazilərdən çıxarlmalıdır”, - keçmiş nazir hədəfi göstərir.

Nazirə görə, Dağlıq Qarabağda silahlı ermənilərin olması, Azərbaycanın terrorçu kimi həbsə aldığı erməni əsgərlərini Ermənistanın hərbi əsir kimi geri tələb etməsi ilə əslində Ermənistan Qarabağda ordu saxlamaq hüququ olduğu görüntüsü yaratmaq istəyir.

Keçmiş nazir vurğulayır ki, Azərbaycanın hüquqi ərazisindəki bütün erməni hərbi birləşmələri dərhal və qeyd-şərtsiz çıxarılmalıdır.

T.Zülfüqarova görə, burada ikinci əsas məsələ odur ki, Qarabağda sovet dönəmində və ya sonradan qanunsuz məskunlaşmış ermənilərin yaratdıqları “özünümüdafiə dəstələri” tərk-silah olunaraq buraxılmalıdır: “Bu iki məsələ həll edildikdən sonra Xankəndi, Xocalı, Ağdərə və s. ərazilərin əsl mənada Azərbaycanın yurisdiksiyasına qaytarılması problemi həllini tapacaq”.

“Bizimyolinfo.az”  saytı isə “Bakının ağır xəstəliklər... qəsəbəsi” sərlövhəli məqalədə müəllif  Bakının Sabunçu qəsəbəsindəki sosial-tibbi vəziyyəti dəyərləndirir.

Müəllif deyir ki, son vaxtlar qəsəbənin mərkəzində problem olmasa da daxili küçələrdə vəziyyət heç də ürəkaçan deyil, indi də Sabunçuda neft buruqları arasında ev tikib yaşayanlar var: “Əgər buna yaşamaq demək olarsa... "Gecəqondular", hasara alınmamış kiçik həyətlər, dəmir parçaları ilə bağlanmış qapılar. Bu insanlar buruqların dibində yaşayırlar” deyə müəllif vurğulayır.

Əmlak məsələləri üzrə ekspert Elnur Fərzəliyev deyir ki,  bu evlərin hamısı sənədsiz evlərdir, əsasən, 1992-1998-ci illərdə tikilib.

Ekoloq Vaqif Əliyev isə bildirir ki, buruqların arasında yaşamaq sağlamlıq üçün çox təhlükəlidir. “Bu, özünü dərhal hiss etdirmir. Orada yaşayanlar onlara nə olacağını bilmirlər. Neft ərazilərində yaşayan insanlar zamanla xərçəngə, tənəffüs yolları, ağciyər xəstəliklərinə və başqa xəstəliklərə yoluxurlar”.

Ekspertə görə, ümumiyyətlə, neft yataqlarının, neft quyularının çox olduğu ərazilər yaşamaq üçün yararsız yerlərdir, uşaqarın da, böyüklərin də sağlamlığı üçün böyük təhlükədir.