Media-icmal 08.11.18

Aqrar sahədə istehsal artımı, bəzi xəstəliklərin çoxalması səbəbləri, Qubada yol açılışına baxış nüansları və s. məsələlər bugünkü (08 noyabr, 2018-ci il) medianın aparıcı mövzularındandır.

Aqrar sahənin inkişaf nüvəsi- aqroparklar

"Azərbaycan" qəzeti "Aqrar inkişafın yeni hədəfləri" sərlövhəli məqalədə aqrar sahədəki uğurları dəyərləndirir.

Müəllif deyir ki, Nazirlər Kabinetinin 2018-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunan iclasında açıqlanan rəqəmlərdən də aydın görünür ki, kəndlinin builki qazancı yaxşı olub.

Yazı müəllifinə görə, elə iqtisadiyyatda 4,3 faizlik ən yüksək artımın kənd təsərrüfatına aid olması da bunun təsdiqidir .

Müəllif aqrar sahənin bu günü və gələcəyilə bağlı prezident İlham Əliyevin Nazirlər Kabinetinin sözügedən iclasındakı çıxışından sitat da gətirir: "...Biz kənd təsərrüfatının ardıcıl artımını görürük. Ümid edirəm ki, növbəti illərdə bu artım daha da böyük olacaq. Kənd təsərrüfatı doqquz ayda 4,3 faiz artıb. Hesab edirəm ki, bu da kifayət qədər yaxşı göstəricidir".

Məqalə müəllifi vurğulayır ki, aqrar sahədə məhsul bolluğunu yaratmaq üçün müasir texnika və texnologiyaların tətbiqi əsas şərtdir və bu istiqamətdə ölkədə bəzi işlər görülüb: "Müasir tələblərə cavab verən, məhsulu itkisiz yığan, becərmədə az yanacaq sərf edən texnikalar alınaraq fermerlərə güzəştli qiymətlərlə satılır. Təkcə cari ilin 9 ayında 5700 kənd təsərrüfatı texnikası alınıb, fermerlərin işi yüngülləşib, məhsuldarlıq çoxalıb".

Müəllif bu sahədə yüksək məhsul əldə olunması üçün meliorativ tədbirlərin görülməsini, əkin sahələrinin keyfiyyətli su ilə təmin edilməsini də əsas amillərdən sayır.

Müəllif bidirir ki, aqrar sahədə ən yüksək məhsuldarlıq iri fermer təsərrüfatlarında və aqroparklarda əldə edilir, ona görə də bu istiqamətdə görülən işlər nəticəsiz qalmır.

Müəllifin deməsinə görə, son vaxtlar bütün dünyada olduğu kimi Azərbaycanda da aqroparkların say, istehsal və emal sferasının genişlənməsi tendensiyası müşahidə edilir və bu da müsbət nəticə verir.

Müəllif deyir ki, hazırda Azərbaycanda müxtəlif istiqamətlər üzrə aqroparklar yaradılır, hazırda 4 aqropark fəaliyyət göstərir, ümumilikdə 45 aqroparkın yaradılması nəzərdə tutulur.

Yazı müəllifinə görə, aqroparklarda məhsuldarlıq çox yüksəkdir və son 2 ildə pomidor istehsalının və ixracının dəfələrlə artması bunu sübut edir.

Müəllif kənd təsərrüfatının müxtəlif sahələrində yüksək kəmiyyət və keyfiyyət göstəriciləri əldə olunmasını da bununla əsaslandırır və aqrar sahənin əhalinin məşğulluğunun təmin olunmasında mühüm rol oynadığını vurğulayır.

Deputat: Normal kadr da yetişmir

"Modern.az"da "Fazil Mustafadan həyəcan təbili: "Keyfiyyətsiz qidalanma onkoloji xəstəlikləri artırıb" sərlövhəli məqalə oxumaq olar.

Müəllif deyir ki, deputat parlamentdəki çıxışında problemə və onun səbəblərinə toxunub: "Bu gün Azərbaycanda onkoloji və QİÇS xəstəlikləri 3 dəfə artıb. Bunun səbəbi isə normal tibb təhsilinin olmaması və keyfiyyətsiz qida məhsulları ilə bağlıdır".

Müəllifin deməsinə görə, deputat F.Mustafa Azərbaycanda lazımi şərait olmadığı üçün tələbənin normal tibb təhsili almasını və kadr kimi yetişməsini mümkünsüz adlandırıb.

"Bunu etiraf etməliyik. Normal təhsil ala bilmədiyindən normal kadr da yetişmir, ona görə də xaricdə təhsili zəruri edirlər. Buna diqqət yetirmək lazımdır və büdcədən bunun üçün lazımi səviyyədə vəsait ayrılmalıdır".

Müəllif deyir ki, deputat tənqidi bununla yekunlaşmayıb, həm də uşaqların normal qidalanmadan əziyyət çəkmələrinə də yönəlib.

Müəllif deyir ki, deputat elə bunun da nəticəsi kimi uşaqların normal fizionomiyaya malik olmadıqları probleminə diqqətin ayrılmasını zəruri hesab edib.

F.Mustafa bildirib ki, Azərbaycandan beynəlxalq olimpiadalarda iştirak edən 400-500 şagird içərisindən çox az qismi normal fizionomiyaya malik olur, yerdə qalanların fizionomiyası isə çox pis görünür.

Deputat hesab edir ki, bunun səbəbinin biri orta məktəblərdə idman dərsinin tədrisindəki problemlərlə bağlıdırsa, digər bir hissəsi isə qidalanma ilə əlaqəlidir.

"Azərbaycan insanı keyfiyyətsiz qida ilə qidalandığından onların fizionomiyası zəif olur, onkoloji və digər xəstəliklər geniş yayılır".

F.Mustafa vurğulayıb ki, bu gün ölkədə qida keyfiyyəsizliyinin olması kimi məsələlər sirr deyil və bu sahədəki problem aradan qaldırılmalıdır.

Deputat F.Mustafa eyni zamanda, uşaq pullarının və doğuşa görə birdəfəlik müavinətin artırılması təklifini səsləndirib: "Bu gün Azərbaycanda 1 milyonadək uşaq var və heç olmasa 6 yaşadək uşaqlara uşaqpulu verilməsi təmin edilməlidir".

"İldırım sürətli" yol tikintisi

"Azadlıq.info"da "33 kilometrlik yol 22 günə necə çəkildi?" sərlövhəli məqalə diqqəti çəkir.

Müəllif bu il açılışı olmuş Quba rayonunun İdrisqışlaq-Qasımqışlaq-Xaspolad-Zərqava-Aspərəsti-Çayqışlaq avtomobil yolunun tikintisinin qısa müddətə, yəni, 22 günə çəkilə bilməsini şübhə altına alır.

Müəllif bu mövzunu gündəmə gətriməsini isə belə izah edir: "Niyə bunu yazıram? Həmin sərəncamla (19 sentyabr) pul ayrılan yolun açılışı oktyabrın 11-də olub; sərəncam veriləndən 22 gün sonra".

Müəllif deyir ki, dövlət başçısı İlham Əliyev bu il sentyabrın 19-da İdrisqışlaq-Qasımqışlaq-Xaspolad-Zərqava-Aspərəsti-Çayqışlaq avtomobil yolunun tikintisi ilə bağlı sərəncam imzalayıb.

Müəllifin deməsinə görə, sərəncamla Azərbaycan Avtomobil Yolları Dövlət Agentliyinə Azərbaycan Respublikasının 2018-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 10,8 milyon (on milyon səkkiz yüz min) manatı ayrılıb.

Müəllif bu sahədə diqqəti ironik olaraq bank əməliyyatlarının "oprerativliyi"nə cəmləyir və bunu mümkünsüz adlandırır və belə bir paralel aparır: "Məsələn, şəhidlərə qanpulu kimi veriləcək 11 min manatla bağlı sərəncam bu il aprelin 19-u tarixində imzalanıb, o sərəncamdan 7 aya yaxın vaxt keçir, şəhid ailələri isə hələ də dövlət qurumlarının qapılarındadır...".

Müəllif deyir ki, Maliyyə Nazirliyi və Nazirlər Kabineti sənədləşmə işlərini ən yaxşı halda sentyabrın sonuna başa vura bilərdilər və bu yolu 22 günə çəkmək mümkünsüzdür: "Ancaq yolun açılışını bildirən qırmızı lent kəsiləndə Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov sərəncamı imzalayana məlumat verir: "...İdrisqışlaq-Qasımqışlaq-Xaspolad-Zərqava-Aspərəsti-Çayqışlaq avtomobil yolu prezident İlham Əliyevin bu ilin sentyabrında imzaladığı sərəncama əsasən tikilib".

"Etiraf edək, yol çəkilişi kimi ağır bir işi, həm də 33 kilometri, belə qısa zamanda başa gətirmək Ginnesin "Rekordlar" kitabına düşəsi faktdır. Həm də ona görə düşəsidir ki, təkcə asfalt basılmayıb, başqa zəruri işlər də görülüb", deyə müəllif bu yolun çəkilməsinə ironik münasibət ifadə edir.

Müəllif burada bir yalanın işə düşdüyünü, vətəndaşa yalan danışıldığını bildirir və belə sual ünvanlayır: "Sərəncamın nə vaxt verilməsindən xəbərsiz Azərbaycan tamaşaçısını da bu yolla aldatdınız, onlar bu açılışdan verilən reportajlara baxıb inandılar. Bəs o 11 kəndin əhalisi, bəs 33 kilometrlik yol? Onlar da inandılarmı 22 günlük möcüzəyə?

Son olaraq müəllifə görə, ya Agentlik rəhbəri prezidenti adlandırır, ya da...